Войти

Войти

Биирдэ өйдөммүппүт – сылбытын туораан бүтэрэн эрэр эбиппит. Өссө биир сылы этэҥҥэ, өлүөр туораан эрэрбититтэн үөрүөх эрэ тустаахпыт. 2020 сыл саха дьонугар балай эмэ үөрүүнү бэрсэн, ол быыһыгар харах уутун да таһааран ааста. Хомойуох иһин, олох суруллубатах сокуонун быһыытынан, баҕарбатахпыт да иһин, араас алдьархай тахсар. Бу сыл, мэлдьи да буоларын курдук, дьон куйахата күүрэр араас быһылаана суох ааспата. Кэлэр сылга ол хатыламматар ханнык диэн, ааспыты санаан ааһыаҕыҥ.

Тохсунньу

Тохсунньу 1 күнүн сарсыардатыгар Дьокуускайга Федор Попов аатынан уулуссаҕа бөх тоҕор баахтан 40 саастаах дьахтар өлүгүн булбуттара. Кэлин биллибитинэн 24 саастаах, урут сууттана сылдьыбыт куорат олохтооҕо подъезка дьахтары көрсөн баран, баһын хампы охсубут уонна бөххө таһааран бырахпыт.

Тохсунньу 11 күнүгэр “Крыша” ресто-барга табаарыстарын кытары сынньана сылдьыбыт, устуулга олорор 37 саастаах эр киһини 30 саастаах уол түҥнэри биэрэн түһэрбит. Онно сөп буолбакка, өйүн сүтэрбит киһини хаста да охсуолаабыт. Ол түмүгэр эмсэҕэлээччи нөҥүө күнүгэр балыыһаҕа сырдык тыына быстыбыт. Сэтинньигэ өлөрүөхсүтү суут 7 сылга күлүүс хаайыытыгар ыыппыта.

Ньурба куоратыгар тохсунньу 14 күнүгэр 26 уонна 31 саастаах, урут сууттана сылдьыбыт уолаттар бииргэ арыгыласпыт 21 саастаах кыыстарын быһаҕынан тирээн туран бөлөҕүнэн күүһүлээбиттэрэ. Кыыс күл мүччү куотан быыһаммыта. Ол дьонтон биирдэрэ бу иннинэ 6 төгүл (!), иккиһэ 3 төгүл сууттана сылдьыбыт эрэссидьибиистэр.

Тохсунньу 2 күнүгэр Ленскэй куоракка бэйдиэ сылдьар 15 ыт бастакы кылаас үөрэнээччитэ дьиэлээн истэҕинэ саба түспүттэрэ, дьолго, ааһан иһэр суоппар көрөн быыһаабыта.

Олунньу

Олунньу 10 күнүгэр “Саханефтегазсбыт” урукку генеральнай дириэктэрэ, Ил Түмэн дьокутаата буола сылдьыбыт Игорь Никитини хас да тэрилтэ салайааччыларын кытары куомуннаһан 18 мөл.солк. хоромньу таһаарбытын иһин уорбалаан туппуттара. Билиҥҥитэ холуобунай дьыала суукка тиийэ илик.

Олунньу 18 күнүгэр Покровскай куоракка 25 саастаах эр киһи 26 саастаах ойоҕун итирэн кэлэн баран, кыптыыйынан хаста да анньан өлөрбүтэ. Ол кэннэ аймахтарыгар саһан сытан, ойоҕун өлөрбүтүн кэпсээбитин туттарбыттара. Өлөрүөхсүт “ойоҕум “арахсыахха” диэбитин сөбүлээбэккэ тыыныгар турбутум” диэн быһаарбыта.

Кулун тутар

Кулун тутар 18 күнүгэр Сунтаар сэлиэнньэтигэр 19 саастаах Алена Ананьеваны бииргэ олорор киһитэ Айсен Конобулов күнүүлээтэх буолан, кыыллыы кырбаан, итии ууга буһаран өлөрбүтэ. Бу быһылааҥҥа биллэр тустуук Николай Охлопков сылдьыспыт буолан, уопсастыбаҕа улахан дуорааннаммыта.

Кулун тутар 29 күнүгэр куорат өрүс пуордун түөлбэтигэр 28 саастаах Михаил Смиренскэй диэн киһийдэх табаарыһын Андрей Балушенков дьиэтигэр тиийэн бүтүн дьиэ кэргэни кыдыйбыта: 31 саастаах ойоҕо Светлананы, кини 66 саастаах ийэтэ Тамара Ивановнаны, 8 саастаах Коляны уонна 5 саастаах Ильяны быһаҕынан анньыталаан өлөрбүтэ, тахсан иһэн ыттарын быһахтаабыта уонна полициялартан куотаары оперативнигы бааһырдыбыта. Алтынньыга Михаил Смиренскэйи үйэтин тухары күлүүс хаайыытыгар уураахтаабыттара.

Муус устар

Муус устар 2 күнүгэр Ньурба улууһугар 47 саастаах эр киһи ойоҕун 12 саастаах кыыһын итирэн баран күүһүлээбит. Эмсэҕэлээбит кыысчаан сонно ута эһэтигэр уонна ийэтигэр тыллаабыт. Педофил “илэ өйдөөҕүм буоллар, маннык быһыыланыам суох этэ, итирикпэр тэптэрэн күүһүлээбиппин” диэн билиммитэ.

Муус устар 22 күнүгэр Үөһээ Бүлүү улууһун Кэнтигэр Бүлүү өрүскэ балыктыы баран иһэн УАЗ массыына муус анныгар барбыта. Ол түмүгэр 8 киһи ууга түспүтэ, хомойуох иһин, биир балыксыт 5 саастаах оҕото өлбүтэ.

Муус устар 25 күнүгэр Өлүөхүмэ улууһун Кыыллааҕыттан Даппарайга Өлүөнэ эбэни туораан испит массыына кытылтан 300-чэ миэтэрэ тэйээт, муус анныгар барбыта. Хомойуох иһин, 1994 уонна 1995 сыллаах төрүөх уолаттар массыынаттан кыайан тахсыбатахтара.

Ыам ыйа

Дьокуускай куорат дьэллик ыттары тутар пуунугар 201 ыты укуоллаан өлөрбүттэрэ. Онуоха Бэтэринээрийэ департаменын салайааччытын уураппыттара уонна куораттааҕы бэтэринээринэй управление начаалынньыгар холуобунай дьыала тэриллибитэ.

Мииринэй улууһугар Ботуобуйа эспэдииссийэтин базатыгар (Мииринэй куоратыттан 154 км ыраах сытар сиригэр) ыам ыйын 20 күнүн сарсыардатыгар 57 уонна 40 саастаах кусчуттар саанан ытыллан өлбүттэрин булбуттара. Ити күн бииргэ кустуу барбыт киһилэрин тутан хаайбыттара.

Ыам ыйын 21 күнүгэр Нерюнгри куоракка гараастан икки эр киһи өлүгүн булбуттара. Бииргэ арыгыласпыт, урут сууттана сылдьыбыт 44 саастаах киһилэрэ, өлүөхсүттэр утуйбуттарын кэннэ, маһынан үлтү сынньыбыта биллибитэ. Эспэртиисэ эр дьон угаардаан өлбүттэрин быһаарбыта. Ити күн уорбаланааччы тутуллубута.

Ыам ыйын 28 күнүгэр Уус Алдан улууһун Майаҕаһыгар 1989 с.т. эдэр киһи чаҕылҕаҥҥа оҕустаран өлө сытарын булбуттара. Ити күн куорат биир гарааһыттан 13 саастаах оҕо умайбыт өлүгүн булбуттара. Гарааска чаҕылҕан охсон баһаар тахсыбыт диэн быһаарбыттара.

Бэс ыйа

Бэс ыйын 6 күнүгэр Дьокуускайга Дзержинскэй уулусса биир дьиэтин бөҕүттэн саҥа төрөөбүт уол оҕо өлүгүн булбуттара. Ол күн 21 саастаах ийэни туппуттара уонна ханна да барбатын курдук баппыысканы туттарбыттара.

Бэс ыйын 13 күнүгэр ХИФУ преподавателин полиция колледжын устудьуоннарыттан бэриги ылбытыгар уорбалаан туппуттара. Кини 2019 сыллаахха устудьуоннартан эксээмэн туппакка, харчы ылбытыгар уорбаламмыта.

Бэс ыйын 22 күнүгэр Бааһынай ырыынагар эргиэн туочукатын ылаары, 1995 сыллаах урбаанньыт ырыынак салайааччытыгар 80 тыһ. солк. бэриги биэрэ туран тутуллубута.

Бэс ыйын 21 күнүгэр Дьокуускайга кырачаан оҕолор төрөппүт көрүүтэ суоҕуттан мэндиэмэннээх дьиэ түннүктэриттэн сууллан эчэйбиттэрэ. Бэс ыйын 23 күнүгэр Мэҥэ Хаҥаласка эмиэ 4 саастаах оҕо түннүктэн сууллубута.

От ыйа

От ыйын 27 күнүгэр Дьокуускай куорат мээрин солбуйааччыта Василий Гоголевы дуоһунаһын сиэрэ суох туһаммытын иһин 4 сылга бириигэбэрдээбиттэрэ. Василий Гоголев Айна Неустроева салайааччылаах тутуу тэрилтэтигэр орооһон 185 мөл. солк. хоромньу оҥорбута биллибитэ. Куомуннаахтара Олег Карамзин уонна Татьяна Самсонова сууттара түмүктэнэ илик.

Томмоттооҕу психоневрологическай дьыспаансырга от ыйыгар эмискэ хоруона хамсыга турбута: 22 киһи ыалдьыбыта, 3 эр киһи уонна 1 дьахтар өлбүттэрэ. Дьону маассабай ыарыыга сутуйуу чахчытынан холуобунай дьыала көбүтүллүбүтэ.

Атырдьах ыйа

Атырдьах ыйын 4 күнүгэр 28 саастаах Ньурба улууһун олохтооҕун нацизмы уруйдааһыҥҥа уорбалаан туппуттара. Уорбаланааччы “Бессмертный полк” онлайн аахсыйаҕа Гитлер хаартыскатын туруорбута биллибитэ.

Атырдьах ыйын 11 күнүгэр Ил Түмэн дьокутаатыгар, “Тээнэ” родовой община бэрэссэдээтэлэ Арсентий Николаевка холуобунай дьыаланы тэрийбиттэрэ. Силиэдэбэтэллэр кинини көмүс хостуур тэрилтэ салайааччытын үрдүк сыананан таас чоҕу тиэйтэриигэ уонна бас билэр тэрилтэтин кытары дуогабар түһэрсэргэ күһэйбит диэн уорбалыыллар.

Атырдьах ыйын 9 күнүгэр куорат Мархатыгар 25 саастаах эр киһи 21 саастаах урукку ойоҕун аҕатын быһаҕынан аспыта. Аҕа кынным өллө дии санаан, били киһийдэх аны ойоҕор саба түһэн, 14 төгүл быһаҕынан анньан өлөрбүтэ. Ыаллара, кырдьаҕас киһи ынчыгын истэн, суһал көмөнү уонна полицияны ыҥырбыттара. Инньэ гынан эр киһи нэһиилэ тыыннаах ордубута. Атырдьах ыйын 13 күнүгэр Жорницкай аатынан уулуссаҕа 50 саастаах эр киһи бииргэ олорор дьахтарын кытары арыгылыы олорон бытыылканан төбөҕө охсон өлөрбүтэ уонна 9-с этээстэн бырахпыта.

Балаҕан ыйа

Балаҕан ыйын 3 күнүгэр “СӨ Урбааны өйүүр пуондатын” салайааччылара Татьяна Коломыцина уонна Лена Платонова итиэннэ пуонда 4 үлэһитэ киксэн, бүддьүөт 70 мөл. солк. уоран үллэстибиттэр диэн уорбаланан тутуллубуттара, дьэҥдьиир бөҕөтө буолбута. Билигин дьыала салгыы силиэстийэлэнэр.

Балаҕан ыйын 12 күнүгэр Анаабыр улууһугар вездеход тимирбитэ. Ол түмүгэр улуус баһылыгын солбуйааччы уонна дьаһалта исписэлииһэ ууга былдьаммыттара. Ити күн сарсыардатыгар улуус дьаһалтатын 4 үлэһитэ балыктыы диэн барбыттар. Орто үрэҕи туораары гыммыттара вездеходтара тимирэн барбыт. Икки киһи тимирэн эрэр вездеходтан ыстанан биэрэккэ тахсыбыттар, икки киһи тимирбит – улуус баһылыгын бастакы солбуйааччы Валерий Зедгенидзев уонна дьаһалта сир боппуруоһугар исписэлииһэ Иннокентий Туприн.

Алтынньы

Уус Майда улууһуттан төрүттээх, “Полярные авиалинии” 28 саастаах пилота Руслан Валеев Екатеринбург куоракка сүппүтэ. Өлүгүн нэдиэлэ буолан баран булбуттара. Валеев хомондьуруопкаҕа сылдьан, коронавируска уорбаланан балыыһаҕа тиийбит уонна балыыһаттан куотан тахсан, куорат киинин биир тэлгэһэтигэр өлө сытарын булбуттара.

Кирзавод түөлбэтигэр баар кыбартыыраҕа 34 саастаах Алексей Ылахов кыыллыы кырбанан өлбүтэ. Бастаан утаа бииргэ олорор атаһа “уулуссаҕа кырбаабыттар этэ” диэбитэ. Онто баара, бэйэтэ өлөрбүт эбит. Алексей Ылахов 11 күн балыыһаҕа сытан баран быстыбыта.

Нам улууһугар элбэх оҕолоох ыал дьиэтэ кытарарга былдьанан ыал ийэтэ, 4 оҕо суорума суолламмыттара.

Сэтинньи

 Сэтинньи 4 күнүгэр Амма Бөтүҥэр чааһынай дьиэҕэ баһаар тахсыбытын умуруорбуттара, онно 50 саастаах дьахтар уонна 48 саастаах эр киһи өлүктэрэ көстүбүттэрэ. Өлүөхсүттэр быһаҕынан анньыллан өлбүттэрэ биллибитэ. Ол күн 58 саастаах эр киһини икки киһини өлөрөн баран дьиэни уоттаабытыгар уорбалаан туппуттара. Ити дьиэҕэ арыгылаан баран иирсэн турбуттар, онуоха ыалдьыт быһахтаан кэбиспит. Охсуһалларын истэн, хостон дьиэлээх дьахтар уһуктан тахсыбыт. Онуоха дьукааҕын өлөрбүппүн тыллыа диэн, дьахтары эмиэ өлөрөн баран, уот анньан кэбиспит уонна атахха биллэрбит.

Сэтинньи 18 күнүгэр Таатта Баайаҕатыгар 9 киһи сүлүһүннээх антисептиги иһэн сүһүрбүттэрэ, түмүгэр 8 киһи суорума суолламмыта, икки ыал оҕото төгүрүк тулаайах хаалаахтаабыттара. 32 саастаах уол нэһиилэ өрүттүбүтэ. Нөҥүө күнүгэр Алдан Угойааныгар эмиэ ити антисептиги иһэн биир киһи өлбүтэ.

Сэтинньи 26 күнүгэр Ил Түмэн дьокутаата, АГАТУ ректора 136 “устудьуону үөрэххэ ылан”, бүддьүөттэн 250 мөл. солк. ыла олорбутугар уорбаланан тутуллубута.

Ахсынньы

Ахсынньы 5 күнэ үүнэр түүнүгэр Өймөкөөн Томторуттан 120 км сиртэн “Тойота Чайзер” алдьаммыт массыынаны булбуттара. Массыына иһигэр 18 саастаах уол өлүгүн уонна кыл мүччү тыыннаах хаалбыт атаһын булан, суһаллык балыыһаҕа илдьибиттэрэ. Уолаттар Дьокуускайтан Магадааҥҥа айаннаан иһэн, ахсынньы аам-даам тымныытыгар суолларыттан туораан хаалаахтаабыттар.

Тарҕат:

Добавить комментарий