35 кВ «Сунтаар – Сардаҥа» уот лииньийэтин өйүүр тирээбилигэр массыына кэтиллибитин туһунан суһал иһитиннэрии Сунтаардааҕы РЭС диспиэччэригэр тохсунньу 29 күнүгэр 02 чаас 19 мүнүүтэҕэ киирбит.
Кэтиллии түмүгэр уот арахсыбатаҕа эрээри, алдьаммыт тирээбили оҥороору «Якутскэнерго» ПАО арҕааҥҥы ситимин үлэһиттэрэ Сунтаар сэлиэнньэтин сорох өттүгэр уоту араарарга күһэллибиттэр.
Билигин сэрэҕэ суох суоппар дьайыытыгар дьыала тэриллэн силиэстийэлиир үлэ бара турар диэн тэрилтэ пресс-сулууспата суруйар.
Энэргиэтиктэр тимир көлөлөөх дьону сэрэхтээх буоларга, бэрээдэги кэспэккэ сылдьарга ыҥыраллар. Көҥүлэ суох сиргэ киирии, тэрилтэ бас билиитин алдьатыы, хоромньуну оҥоруу иһин холуобунай дьыала тэриллиэн сөптөөх диэн сэрэтэллэр.
