Аҕам саастаах дьон, бочуоттаах сынньалаҥҥа баран, уопсастыбаттан эмискэ тэйэн, дьиэлэригэр олорон соҕотохсуйар, санаарҕыыр, ыарытыйар түгэннэрэ элбэх буолар. Ол да иһин, «Аврора» мэдиссиинэ килииникэтэ бу кыһалҕаҕа бастакынан болҕомто ууран, Дьокуускайга аҕам саастаах дьону чэбдигирдэр, аралдьытар соруктаах «Көхтөөх уһун үйэлэнии кииннэрин» тэрийбитэ.
Оттон быйыл сайын маннык киини аан бастакытын тыа сиригэр, кэрэ айылҕалаах Хаҥалас улууһун Булгунньахтаах сэлиэнньэтигэр арыйан, "Утум" диэн ааттаан үлэлэттилэр. Киин дьаһабыла, СӨ култууратын туйгуна, норуот маастара Николай Никитин кэпсииринэн, толору хааччыллыылаах, бары өттүнэн табыгастаах дьиэлээх-уоттаах базаҕа бэс ыйыттан саҕалаан Сахабыт сирин бары улуустарын аҕам саастаахтара, алта сезон устата чэбдигирэн, астына-дуоһуйа сынньанан барбыттар. Онон, бүгүн кинилэр "Утум" уһун үйэлэнии киинин туһунан санааларын, махтал тылларын таһаарабыт.
Чурапчы Хайахсытыттан Дария Тимофеевна Михайлова, Арассыыйа кинематографиятын туйгуна, үлэ бэтэрээнэ:
- Кэрэ айылҕалаах «Утум» көхтөөх уһун үйэлэнии киинин үлэһиттэригэр махтал! Биһигини ис сүрэххититтэн кыһанан, минньигэстик аһатан, дойдутугут кэрэ-бэлиэ сирдэринэн дьаарбатан сырытыннарбыккытыгар. Биһигини элбэххэ үөрэтэн, маастар-кылаастары тэрийэн, санаан да көрбөтөх оҥоһуктарбытын оҥорторон, сэрээккэлэтэн, үҥкүүлэтэн, ыллатан, эдэр сааспытын санаттыгыт! Бары доруобай, дьоллоох буолуҥ! – диэн махтанар.
Дьокуускай куораттан Наталья Афанасьевна Васильева, СӨ Үөрэҕириитин бочуоттаах бэтэрээнэ:
- Булгунньахтаах «Утум» киинигэр кэлэн астына сынньанан, үөрэн-көтөн, дьону кытта билсэн, кыайбатахпын кыайан, сатаабатахпын сатаан, эмтэнэн-томтонон дьиэбэр баран эрэбин. Үтүө сыһыаҥҥыт, эйэҕэс майгыгыт иһин истиҥник махтанабын. Урут хаһан да сылдьыбатах, кэрэ айылҕалаах, мааны дьонноох Булгунньахтаах сирин хаһан да умнуом суоҕа, табылыннаҕына өссө да кэлэ сылдьыам. Барыгытыгар үтүөнү баҕара хаалабын, - диэн иккистээн эргиллиэх буолан эрэннэрдэ.
Булгунньахтаахтан Надежда Мураш махталын быһа тардан нууччалыы таһаарабыт:
- Выражаю глубокую, искреннюю благодарность и признательность работникам Центра активного долголетия «Утум» за отдых и лечение. Также хочу поблагодарить главу 1-Мальжагарского наслега Айталину Ивановну за честь попасть сюда, где все сотрудники просто прелесть. Всем огромное спасибо!
Оттон Клара Иннокентьевна Матвеева, СӨ үөрэҕириитин туйгуна, Нам улууһун ытык киһитэ, РФ Бочуот уордьанын, «Үтүө дьыала иһин» Царевич Дмитрий уордьанын, «Ийэҕэ үрдүк махтал», «Гражданскай килбиэн» бэлиэлэр, А.Е. Кулаковскай аатынан судаарыстыбаннай, РФ Бэрэсидьиэнин үөрэҕириигэ ситиһиилэрин иһин бириэмийэлэр хаһаайкалара, бары сынньаммыт дьон аатыттан махтанна уонна сынньалаҥ туһунан барытын сиһилии кэпсээтэ:
- "Утум" профилакторийга 10 күн устата «Аврора» килииникэ араас исписэлиистэригэр эмтэнии кууруһун аастым. Эмчиттэр олус кыһаллан- мүһэллэн, ымпыктаан-чымпыктаан көрөллөрүн астынным. Битэмииннэри, ыарыыларбар туһааннаах укуоллары, массаас ылан, доруобуйабын бөҕөргөтүннүм. Уон күн устата аттыбытыгар сылдьан, биһигини күн аайы бүөбэйдээбит, нарын илиилэринэн тутан-хабан, сымнаҕастык укуоллаан, систиэмэ туруоран, хааммыт баттааһынын мээрэйдээн турукпутун хонтуруоллаабыт, эйэҕэс, сылаас сыһыанынан угуттаабыт сиэстэрэбитин Ольга Ивановнабытын бэһис сезон группа дьоно бары убаастаатыбыт, махтанныбыт.
Илбииһит Маргарита Николаевна аптаах илиитинэн эппитин-сииммитин имитэн, сылаас ытыһынан имэрийэн, илбийэн, ыарыыбыт-дьарҕабыт мүлүрүйдэ, хааммыт сүүрүүтэ түргэтээтэ, сүрэхпит тэбиитэ күүһүрдэ.
Асчыппыт Варвара Владимировна кыһаллан-мүһэллэн бэлэмнээбит аһын күҥҥэ түөртэ, тото-хана, астына аһыыбыт. Хааһы буһарарга киниттэн үөрэммит киһи дии санаатым - оннук минньигэс.
Дьиэбит мэлдьи ыраас буоларын туһугар кыһаллааччы Нина Николаевна күнү быһа хаста да киирэн сууйар-сотор. Кыырпах да быылы, бөҕү-сыыһы көрдөөтөххүнэ да булбаккын.
Эмтэнэрбит, турукпутун бөҕөргөтүнэрбит таһынан, манна иллэҥ кэми үрдүк таһымнаахтык, туһалаахтык, көдьүүстээхтик атаардыбыт. Ол курдук, профилакторий управляющайдарын Николай Ильич, Лена Леонидовна кыһамньыларынан араас тэрээһин, экскурсия, ырыаҕа, үҥкүүгэ, флешмобка, уһуйуу, оонньуулар, кыбытык тигиигэ, садоводствоҕа, уруһуйга тиийэ маастар-кылаастар ыытылынныллар. Ханнык да профилакторийга маннык баарын истибэтэҕим. Баҕар билбэтим буолуо.
Баяниспыт Петр Еремеевич олус кэрэ, талааннаах киһи, умсугутар турукка киллэрэр ырыаһыт, ону таһынан худуоһунньук, уруһуйга уһуйааччы. «Таҥара киһиэхэ биэрэр да буолар эбит!» диэн кинини сөхтүм-махтайдым.
Нарын-намчы, таҥара табатын курдук чэпчэкитик дайан хаамар кэрэ далбар, хореограф Надежда Николаевна үҥкүүгэ, фитнескэ үөрэттэ. Биһиги ону төһө сатыырбытынан кыахтаахпытынан, оһуой- хоһуой, тиэр-маар да үктээтэрбит, үтүктэн истибит.
Олохтоох Евграфова Галина Семеновна ырай курдук саадыгар сылдьан, Саха сиригэр үүнэр-үүммэт, эҥин-эгэлгэ үүнээйилэрин көрөн, сөрү диэн сөхтүбүт, дьиктиргээтибит, кэпсээнин иһиттибит, омуннура-омуннура ону маны ыйыталастыбыт, элбэҕи биллибит, ымсыырдыбыт. Дьиэбитигэр тиийэн үтүктүөх буоллубут. Төһөтө сатанар?
Түмүгэр өлгөм астаах яблоня, рябина анныларыгар былдьаһа-былдьаһа хаартыскаҕа түстүбүт.
Дьэ уонна саамай сөхпүт, кэрэхсээбит, махтаммыт киһим – управляющайбыт, норуота маастара Николай Ильич. Киниттэн саха киһитэ саамай сэргиир кыбытык тигиитигэр уһуйуллан уонна сахалыы харысхал оҥостон, бары дьиэбитигэр илдьэ барар буоллубут.
Оттон Лена Леонидовна сэлиэнньэ кэрэхсэнэр сирдэринэн экскурсия оҥорон сэргэхситтэ. Ону таһынан, батыһыннара сылдьан, хаһан да көрбөтөх кыылларбытын бизоннары көрдөрөн, ол кыыллар тустарынан үлэһит Ян астык кэпсээнин сэргээн иһиттибит. Онтон Саха Сирин биир кэрэхсэбиллээх, бэлиэ, үгүс киһи көрүөн, сылдьыан баҕарар сиригэр Кыһыл Элэһин (Тукулаан) кумах хайатыгар тахсан, Булгунньахтаах кэрэ айылҕатын анааран көрдүбүт. Уопсайынан, Булгунньахтаах олус кэрэ айылҕалааҕын, тыҥаны сайа охсор ыраас салгыннааҕын, эйэҕэс, ыалдьытымсах дьоннооҕун бэлиэтии көрдүбүт.
Бу профилакторийга талыллыбыт курдук бастыҥ, барыга бары эппиэтинэстээхтик сыһыаннаһар, истиҥ-иһирэх дууһалаах дьон биһигини бүөбэйдээн, көрөн-истэн, 10 күн устата умнуллубат кэрэ сынньалаҥы бэлэхтээтилэр. Онон, сааһырбыт дьоҥҥо олус наадалаах, махталлаах, сыралаах үлэҕитигэр барҕа махтал. Саҕалаабыт дьыалаҕыт сайда турдун, ситиһиилээх буоллун, дьон махталын ыла турдун. Тус бэйэҕитигэр кытаанах, чөл доруобуйаны, ситиһиини, табыллыыны, дьолу баҕарабын.
Өссө махталбын тиэрдиэхпин баҕарабын бу 10 хонукка өрөспүүбүлүкэ араас муннуктарыттан кэлэн бииргэ алтыспыт, биир дьиэ кэргэн курдук чугастык, иллээхтик, өйөһөн-өйдөһөн олорбут доҕотторбор. Биир палаатаҕа олорбут, дьүөгэ курдук буолбут сырдык, муударай, ураты эйгэлээх кыргыттарбар Альбина Большаковаҕа, Мария Семеноваҕа - кылгас да буоллар, чаҕылхай, өйгө хаалар алтыһар түгэни бэлэхтээбиккитигэр махтал! Киһи, көрөөт да, 85 сааһы биэрбэт, эдэр көрүҥнээх, чэпчэкитик хаамар-сиимэр, бэйэтин лаппа кыанар, чөллөркөй, кылыһахтаах куоластаах эдьиий Прасковья Дмитриевнаны олус сөхтүм, ытыктаатым.
Айар талааннаах, хоһоон илбиһэ иҥмит Саргылаана Стручкованы, кэрэ куоластаах Генриетта Габышеваны, эдэр, кыраһыабай, инициативнай, сайаҕас Ирина Лукинаны, саамай сытыы өйдөөх, элбэх билиилээх, киһини сэргэхситэр элбэх сонун даҕаны, киһини күллэрэр даҕаны кэпсээннээх, киһи эрэ ытыктыы көрөр Трофим Петровиһы, эйэҕэс, бэһиэлэй, ис киирбэх Иннокентий Ивановы, дьоһуннаах, аптарытыаттаах Алексей Аверьяновы бу умнуллубат уон хонукка бииргэ буолбуккутугар махталым улахан. Бары доруобай, уһун үйэлээх, чөл, чэгиэн буолуҥ, күндү доҕотторум.
Дьэ, ити курдук аҕам саастаах ытык-мааны дьоммут, олохторугар биир умнуллубат кэми атааран, астына-дуоһуйа сынньанан, саҥаны билэн-көрөн, уонна саамай сүрүнэ, сылы туоруурга күүс-уох эбинэн, туруктарын бөҕөргөтөн бараллара хайдахтаах курдук үчүгэйий?
Онон, дойдуларын, оҕолорун, сиэннэрин туһугар өр сылларга үтүө суобастаахтык үлэлээбит кырдьаҕастарбыт олохторун төһө кыалларынан киэргэтиэххэ, тупсарыахха уонна уһатыахха диэн этэн туран, төрөппүттэргитин, эбэлэргитин-эһэлэргитин «Утум» уһун үйэлэнии киинигэр ыытыҥ диэн ыҥырабыт.
Билигин алтынньы 2 күнүттэн 12 күнүгэр диэри үлэлиэхтээх сэттис сезоҥҥа сайаапкалары ыла тураллар. Билсэр уонна суруйтарар нүөмэрдэр: +79141067911, +79241718432.
Бэйэ кэр.
