Кэмпэндээйи орто оскуолатыгар бэрт сонун тэрээһин буолла. Наталья Дмитриевна Тимофеева салайааччылаах оскуола иһинэн үлэлиир "Кэрэл" оҕо тэрилтэтин көҕүлээһининэн, нэһилиэкпит олохтооҕо, II группалаах инбэлиит Пай Ольга Николаевна өр сылларга мунньубут араас кэллиэксийэтин быыстапката буолла.
Уруучукалар, араас лотереялар, кэнсиэрт билиэттэрэ, кэмпиэт суулара, оонньуурдар, хоруопкалар, муляжтар, уопсайа 1483 араас мал-сал, икки улахан тэриэлкэҕэ ракушкалар ууруллан, үөрэнээччилэри, учууталлары кэрэхсэттэ уонна бассаап ситиминэн элбэх дьон болҕомтотун тарта.
Үгүс киһи Ольга итинник арааһы хомуйан мунньарын билэн, сөхтө. Оттон кини хаамыскаҕа бэркэ оонньуурун, нэһилиэк чиэһин улууска элбэхтик көмүскээбитин билэбит. Ольга оҕолорго маастар-кылаас ыытан, ол сатабылын көрдөрдө.
Быйыл Ольга Николаевна 65 сааһын томточчу туолла. Түгэнинэн туһанан, киниэхэ чэгиэн доруобуйаны, үтүмэн үөрүүнү, өссө да араас кэллиэксийэҕинн элбэтэн, атын да быыстапкаларга көхтөөхтүк кытта тур, куруук үөрэ-көтө сырыт.
Татьяна Местникова «Сунтаар сонуннара».
