РФ Көлөҕө министиэристибэтэ 2024 с. диэри 66 эрэгийиэннээҕи салгын пуордун саҥардарга, инфраструктуратын тупсарарга анал бырайыак оҥордо. Онтон 38-һа Уһук Илиҥҥэ, ол иһигэр Саха сиригэр баар.
Ити барыта В.В. Путин “ыам ыйынааҕы” ыйаахтарын чэрчитинэн оҥоһуллар. Санаттахха, ол туһунан Ил Дархан э.т. Айсен Николаев Көлө миниистирэ Евгений Дитриҕи кытта от ыйыгар кэпсэтэн турар.
Дойдуга саамай элбэх салгын пуортаах эрэгийиэн – Саха сирэ. 32 салгын пуорда, 133 түһэр былаһаакка баар. Онтон билиҥҥитэ Алдан, Бүлүү, Мииринэй, Нерюнгри, Полярнай, Тиксии, Таалакаан, Чокуурдаах уонна Дьокуускай эрэ былаһааккалара кытаанах бүрүөһүннээхтэр. Онон саҥардыы бырагырааматыгар быйыл Өлүөхүмэ, Ньурба, Мииринэй, Черскэй, Эдьигээн, Хаандыга, Үрүҥ Хайа, Үөһээ Бүлүү, Бүлүү, Депутатскай, Сангаар, Нерюнгри, Полярнай, Уус Ньара, Маҕан – барыта 15 салгын пуорда киирдэ. Үлэ харчы көрүлүннэҕинэ саҕаланыахтаах.
