Войти

Войти

Үһүттэн сэттэтигэр диэри саастаах оҕоҕо хас ый аайы ананар төлөбүр бу дьыл бэс ыйын 1 күнүттэн саҕалаан, ыытыллара быһаарыллыбыт. Чопчулаан эттэххэ, маннык эбии төлөбүр тииһинэн олоруу алын кээмэйигэр эппиэттэспэт дохуоттаах ыалга эрэ бэриллэр.

Маныаха өрөспүүбүлүкэ икки суонатыгар тус-туһунан тииһинэн олоруу алын кээмэйэ баарын санатабыт. Ол курдук, 1-кы суонаҕа – 10 тыһ. 274 солк., 2-с суонаҕа – 8 651 солк. Оттон ыйдааҕы көмө төлөбүр кээмэйэ ити суума 50 бырыһыанын саҕа буолар эбит. Быһата, тииһинэн олоруу алын кээмэйин аҥаарын саҕанан судаарыстыба көмөлөһөр. Өскөтүн итинник намыһах дохуоттаан ыал хас да үһүттэн сэттэтигэр диэри саастаах оҕолоох түгэнигэр, хас биирдии оҕотугар итиччэ кээмэй төлөнөр.
Маннык төлөбүр бу дьыл тохсунньу 1 күнүттэн ааҕыллар. Ол аата, холобур, ыал итинник төлөбүрү биэриҥ диэн сайаапкатын 2020 сыл бэс  ыйын 1 күнүттэн саҕалаан туттардаҕына, иннинээҕи алта ый төлөбүрүн эмиэ ылар, өскөтүн оҕото бу дьыл тохсунньутугар бэлиэр үһүн туолбут түгэнигэр. Оттон оҕо тохсунньуттан бэс ыйыгар диэри кэмҥэ үс сааһын туолбут эбэтэр туолар буоллаҕына, хаһан үһүн толору туолбут кэмиттэн саҕалаан төлөбүр ааҕыллар.
Сайабылыанньаҕытын Судаарыстыбаннай уонна муниципальнай  өҥөлөр кэлим порталларын нөҥүө электроннай көрүҥүнэн ыытаҕыт. Таһырдьа тахса сатыыр наадата суох. Итинтэн атын ирдэнэр докумуоннары, ол иһигэр дьиэ кэргэн дохуотун туһунан сибидиэнньэни, туһааннаах биэдэмэстибэлэр   бэйэ ыккардыгар бэрсиэхтэрэ диэбиттэр.
Онон күн бүгүн Госуслуга порталыгар тус кэбиниэтэ суох дьон, онон ити www.gosuslugi.ru порталга киирэн, регистрацияланыаххытын уонна “учетнай записькытын” бигэргэттэриэххитин наада.
Ону таһынан, өскөтүн эһиги Сбербаан, Тинькофф эбэтэр Почта Банк килийиэнэ эбит буоллаххытына, ити бааннар интэриниэт-бааннарын эбэтэр мобильнай сыһыарыыларын веб-версиятыгар киирэн, Госуслуга учуотнай запиһын астар кыахтааххыт. Суруйбут дааннайгытын бэрэбиэркэлэммитин кэнниттэн эһиги тута бааҥҥа да, Хааччыйар атын кииҥҥэ да тиийэ сатаабакка, Учетнай записькыт бигэргэтиитин ылаҕыт.
gosuslugi.ru  кэлим интэриниэт-портал чааһыгар ыйытыылаах, өйдөөбөт түгэҥҥитигэр 8 800 100-70-10 эрийэн билсэр кыахтааххыт.  Суотабай төлөпүөнүнэн эрийэр түгэҥҥэ 115 баттыыгыт.
Бу туһунан СӨ Үлэҕэ уонна социальнай сайдыыга министиэристибэтин пресс-сулууспата иһитиннэрэр.

Тарҕат:

Добавить комментарий

Бүтэһик сонуннар