Социальнай гаастааһын боппуруоһугар даҕатан, манна быһаччы сыһыаннаах биэдэмистибэлэргэ эрийэ сырыттым.
Чопчу, чуолкай эппиэт биэрээччи мэлигир. Куотунары баҕас манна сатыыллар. Үксүгэр:“Билбэппит, онтон ыйыт, мантан ыйыт”, - диэн тыллаахтар.
Чернышевскай шоссеҕа, урукку «АЛРОСА-Газ» хонтуоратыгар, “Айхал-Транс-Газ” производственнай-тэхиниичэскэй салаата (ПТО) олохсуйда. Олор билигин социальнай гаастааһын боппуруоһун быһаараллар. Ол эбэтэр, эн чааһынай дьиэҥ дуу, даачаҥ дуу гаас утума барар сириттэн чугас сытар буоллаҕына, кинилэр боппуруоскун быһаарар кыахтаахтар. Социальнай гаастааһын чэрчитинэн, тиэргэниҥ кытыытыгар диэри төлөбүрэ суох турбаны сыһыары тартарыаххын сөп. Оччоҕо улаханнык ороскуотурбаккын.
Бу диэн эттэххэ, Мииринэй оройуонун нэһилиэнньэлээх пууннарын гаастааһын туруга араас. Таас-Үрэххэ дьэ саҥа сэргэхсийэн эрэллэр.
Иллэрээ сыл, нэһилиэк дьаһалтатын улахан туруорсуутунан, «ИНК» хампаанньа уон дьиэни гаастаабыта. Быйыл эмиэ бу хампаанньа көмөтүнэн отут дьиэ гаастаныахтаах. Оттон Мииринэй куоратын, чааһынай дьиэлэрин оройуонугар, гаас уматык тумуга кэлбитэ төһө да ырааппытын иһин, гаастааһын тэтимэ бытаан. 2019-2021 сылларга, Мииринэй куоратыгар, 50-ча эрэ дьиэ гаастанна.
Бу, Мииринэй курдук кыахтаах промышленнай оройуоҥҥа кыра. Гаас ситимэ уһаты тардыллан, тумуга олбуордар ыксаларыгар тириэрдиллибит дьиэлэргэ, “күөх төлөн” умайыыта түргэтиэн сөп.
Гааһы дьиэҕэ киллэртэрэргэ туох ирдэнэрий? Бастатан туран – тэхиниичэскэй усулуобуйа. Маннык докумуону оҥорторорго уонна гааһы киллэртэрэргэ, “АЛРОСА-Гаас” тэрилтэни кытары үлэлиириҥ ирдэнэр. Өссө туох ирдэнэрин ааттаталыыбын. Дьиэҕин гаастааһын каартата наада. Ол эбэтэр, олбуоруҥ хайа өттүнэн гаас турбата дьиэҕэр киирэрэ. Котелы талыы уонна атыылаһан, дьиэҕэ аҕалан туруоруу. Гаас билиитэтин аҕалыы. Төһө уматык туттулларын кээмэйдиир усчуотчук туруортарыы. Балачча бириэмэни гаас утумун олбуорга таҥыы ылар.
2018 сыллаахха, чааһынай дьиэҕэ гаас киллэриитигэр 150 тыһыынча ороскуоттанар буоллаҕына, 2022 сылга 250 тыһыынчата суох саарамматыҥ да буолуо.
Онон, социальнай гаастааһынынан интэриэһиргээччилэр Чернышевскай шоссетыгар баар «Айхал-Транс-Газ» ПТО-гар уталыппакка ыйыталаһаргыт наада.
Станислав Алексеев. Мииринэй куората. Ааптар хаартыскаҕа түһэриилэрэ.
