«Арассыыйа оскуолаларыгар киинэ уруоктара» бырайыак чэрчитинэн уһуллубут «МОСТ» тэттик уус-уран киинэ атын регион оҕолорун олус долгутта. Ол туһунан хартыына сценариһа, туруорааччы режиссёра Елена Дубровская өрөспүүбүлүкэ салалтатын вице-премьера Ольга Балабкинаҕа кэпсээтэ.
Бу киинэҕэ дьулуурдаах уонна тулуурдаах буолуу, технология уонна итэҕэл көмөтүнэн киһи аар тайҕаттан да быыһаныан сөптөөҕө көстөр. Арассыыйа оҕолоро дойду саамай улахан субъегын – Саха сирин туһунан, манна күүстээх санаалаах уонна үлэһит дьон, баай култууралаах, үтүө үгэстээх уонна сиэрдээх саха норуота олорорун биллилэр, хоту сир аар айылҕатын сөбүлээтилэр.
«Арассыыйа оскуолаларыгар киинэ уруоктара. Аан дойду оскуолаларыгар киинэ уруоктара» бырайыак сүрүн соруга «үрдүк сиэрдээх-майгылаах, киэҥ билиилээх-көрүүлээх, социальнай сатабыллаах киһини иитэн таһаарыы» буолар. Ол курдук, бырайыакка киирбит 99 киинэттэн хас биирдиитэ киһи майгытын хайа эрэ өрүтүн арыйарга ананар. Арассыыйа үөрэнээччилэрэ кылаас чаастарыгар ыйга биир киинэни көрөллөр, ырыталлар уонна түмүк оҥороллор. Тэрийээччилэр бу үтүө түмүктээх буоларыгар эрэллээхтэр.
Сонун төрдө: CӨ Бырабыыталыстыбатын уонна Ил Дарханын пресс-сулууспата
Хаартыска: Мария Васильева
