От ыйын 1-2 күннэригэр Өймөкөөн улууһун Томторугар Олоҥхо ыһыаҕа буолан ааста. Икки күн усталаах туоратыгар бу дьоро тэрээһин тутаах дьоно – олоҥхоһуттар – илин-кэлин түһүстүлэр.
Ол түмүгүнэн, Таатта улууһун олоҥхоһута Алексей Николаев гран-при аатын ылан, 700 000 солкуобайдаах сэртипэкээтинэн наҕараадаланна. Оттон ыччат дьон ортотугар бастакы миэстэни Мэҥэ Хаҥаластан Марфа Аммосова ылан, 300 000 солкуобайынан бириэмийэлэннэ. Бастаҥ олоҥхоһуттарга наҕарааданы Ил Түмэн бэрэссэдээтэлин бастакы солбуйааччыта Александр Николаевич Жирков туттарда.
“Олоҥхолообутум уонтан тахса сыл буолла. Ол гынан баран, кыайыам дии санаабатаҕым. Олус соһуйдум”, – диэн Алексей Николаев үөрүүтүн үллэстэр.
Оттон 22 саастаах, Мэҥэ Хаҥаластан төрүттээх Марфа Аммосова бу кыайыытын инньэ 17 сыл күүппүт.
“Мин букатын кырабыттан, биэс сааспыттан, дьарыктанабын. Онон, бу олус күүтүүлээх, баҕалаах кыайыы буолла. Чугас дьоммор, салайааччыларбар, төрөөбүт улууспар уонна миигин өйөөбүт бука бары дьоммор-сэргэбэр махталбын тиэрдэбин”, – диир кини.
Санаттахха, Өймөкөөн ыһыаҕар олоҥхоһуттар күрэхтэригэр 200-тэн тахса киһи кытынна. Ол иһигэр 4-17 саастаах 50-тан тахса оҕо, 35-гэр диэри саастаах 28 ыччат уонна 35-тэн үөһэ саастаах 58 киһи.
Хаартыска: Мария АРХИПОВА.
