Щепкин аатынан училище 6 көлүөнэ оҕолоро бүгүн дойдуларыгар үрдүк үөрэх кыһатын бүтэрэн кэлбиттэрин дорҕоонноохтук биллэрдилэр! Эчи эдэрдэрин, кэрэлэрин!
Бу киэһэ эдэр саас, таптал, сырдык иэйии, кэрэ эйгэтин үрдүк ускуустуба нөҥүө дьонноругар-сэргэлэригэр бэлэхтээн, хардатын ытыс тыаһын, тапталы билэн, алгыс ылан айар-тутар киэҥ аартыктарыгар үктэннилэр! Кэскиллээх Кэрэ дьоммутугар тулууру, дьулууру, үрдүк Ускуустубаҕа – тыйаатырга – бараммат сүгүрүйүүнү баҕарабыт!
Бу оҕолору нуучча чулуу артыыстара Людмила Титова, Анна Гарнова, Дарья Аносова түөрт сыл устата ийэлии бүөбэйдээн илдьэ сылдьыбыттар. Үөрэппит оҕолорун арыаллаан кэлэн, көрөөччү дьүүлүгэр тахсар долгутуулаах түгэннэрин үллэһиннилэр. Олус истиҥ, харах уулаах этиилэригэр: “Оҕолорбутун харыстааҥ уонна таптааҥ!” – диэтилэр эбээт. Бу аҕыйах тылга элбэх да санаа этилиннэ... Бу артыыс дьахталлар сүрэхтэрин сылаа хас биирдиибитигэр биллэргэ дылы буолла! Ону тэҥэ “Тылгытын илдьэ сылдьыҥ, норуоккутугар бэриниилээх, төрүт култуураҕытыгар харыстабыллаах, аҕа саастаах көлүөнэҕитигэр ытыктабыллаах буолуҥ” диэн алҕаатылар.
Тыйаатыр дьиэтиттэн сүргэм көтөҕүллэн, дуоһуйан, сырдаан, чэпчээн, туох эрэ кэрэҕэ сыстан, сайыҥҥы чуумпу киэһэм ураты уйан туруктанна.
Биир дойдулаахпар Дьарааһыҥҥа махталбын этэбин. Бу үрдүк үөрүүнү үллэстэн, тыйаатырга ыҥыран, ураты умнуллубат түгэни бэлэхтээбиккэр!
Суруйуубун С.Данилов “Кэрэ” диэн хоһоонунан түмүктүүм.
А. УСКЕЕВА, бэс ыйын 30 күнэ, 2023 с.
