РФ култууратын үтүөлээх үлэһиттэрэ Матрена уонна Алексей Павловтар салайааччылаах Саха сирин Үүнэр көлүөнэтин тыйаатыра балаҕан ыйын 22-с күнүгэр 32-с айар дьылын «Уйбаан уонна Соноҕосчоон» (“Иван и Конек”) испэктээгинэн арыйда.
Тэрээһин саҕаланыан иннинэ тыйаатыр иннигэр уонна киэргэтиллибит сүрүн фойеҕа артыыстар, остуоруйа араас дьоруойдара буолан, оҕолору үөрэ-көтө, сэргэхтик көрүстүлэр. Эдэр көрөөччүлэр көстүүмнээх сүүнэ баабырдыын, бөрөлүүн, тииҥниин, Гена крокодиллыын, Чебурашкалыын уонна саһыллыын алтыстылар, кинилэри кытта хаартыскаҕа түстүлэр.
Салгыы Үүнэр көлүөнэ тыйаатырын уус-уран салайааччыта, РФ култууратын үтүөлээх үлэһитэ, СӨ норуодунай артыыһа Алексей Павлов тыл эттэ, саҥа үүммүт 32-с айар дьыл аһыллыытынан бары кэлбит дьону итиитик-истиҥник эҕэрдэлээтэ. Бу саҥа сезоҥҥа көрөөччүлэр дойдуга бэриниилээх буолуу туһунан уонна оскуола үөрэнэр тосхолунан турбут испэктээктэри, онтон кырачааннар иитэр-үөрэтэр уонна билиилэрин хаҥатар ис хоһоонноох испэктээктэри көрүөхтэрэ диэн бэлиэтээтэ.
«Уйбаан уонна Соноҕосчоон» испэктээк оскуола үөрэтэр тосхолунан, Арассыыйаҕа педагог уонна уһуйааччы сылын чэрчитинэн турда. Бары билэрбит курдук, нуучча суруйааччыта Петр Ершов «Бөкчөгөркөөн Соноҕосчоон» остуоруйата аптаах дьоруойдарынан баай. Манна Саар Көтөр, дьикти-сүүнэ Саалым Балык (Чудо-юдо рыба-кит), көмүс сиэллээх сылгылар уонна да атыттар бааллар. Айымньы төрүкү ис хоһооно дириҥ муударастаах уонна философиялаах буолан, хас биирдии көрөөччүнү үтүөнү уонна мөкүнү өссө төгүл араара үөрэттэ диэтэхпитинэ сыыспаппыт буолуо.
Ол курдук, испэктээктэн киһи астынара, кэрэхсии көрөрө элбэх буолла - аныгы ураты киэргэтиилэр, чаҕылхай өҥнөөх көстүүмнэр, кылабачыйа сылдьар декорациялар, астык тэтимнээх музыка, оҕону угуйар алыптаах эйгэ уонна санааны көтөҕөр элэккэй юмор. Онон, «Уйбаан уонна Соноҕосчоон» чаҕылхай туруоруу олус сэргэх, кэрэхсэбиллээх буолан, саалаҕа мустубут оҕолор, учууталлар уонна төрөппүттэр бука бары сүргэлэрэ көтөҕүллэн, санаалара манньыйан тарҕастылар.
Маннык үтүө тэрээһини бэлэхтээн ааспыт тыйаатыр бары үлэһиттэригэр, чуолаан испэктээги туруорбут маастардарга, туруорааччы- режиссерга, СӨ култууратын туйгуна Прасковья Павловаҕа, туруорааччы-худуоһунньукка, СӨ култууратын туйгуна Мария Ивановаҕа, сүрүн оруолу толорбут артыыстарга Лиза Далбараеваҕа (Соноҕосчоон) уонна Спартак Ларионовка (Уйбаан) махтал уонна хайҕал тылларын аныыбыт. Үүнэр көлүөнэ тыйаатырын 32-с айар дьылыгар саҥа кэрэхсэбиллээх испэктээктэри уонна үгүс ситиһиилэри баҕарабыт!
Сонун төрдө: СӨ Үүнэр көлүөнэ тыйаатыра
