Ахсынньы 1 күнүттэн “Кыһын Саха сириттэн саҕаланар” бэстибээл киэҥ далааһыннаахтык саҕаламмыта. Бу улахан тэрээһин чэрчитинэн “Бриллиантовые нотки. Олоҥхо дойдутун талааннара” көрүү күрэх 2013 сылтан үтүө үгэскэ кубулуйан ыытыллар. Манна Саха сирин араас муннугуттан 3 саастарыттан саҕалаан, кырачаан талааннар улахан сыанаҕа тахсарга холоноллор, бастакы ситиһиилэрин ылаллар.
Бэстибээл сүүмэрдиир түһүмэҕэ улуустарынан ыытыллыбыта, оттон бастыҥнар бу күннэргэ Дьокуускайга мустан күрэхтэһиэхтээхтэр этэ. Ол эрээри, киин куоракка дьаҥ туран, оскуолалар харантыыҥҥа сабыллыбыттара, маассабай тэрээһиннэр бобуллубуттара.
Бэстибээлгэ кыттаары ыраах Эбээн Бытантай улууһуттан сэтинньи 27 күнүгэр 3-7 саастаах кырачааннар Дьокуускайга көтөн кэлбиттэр. Ол эрээри, сарсыныгар куораттааҕы үөрэх управлениета харантыыны биллэрэн кэбиспитэ, инньэ гынан, бэстибээл бу ый 20 чыыһылатыгар көспүтэ. Бачча ыраахтан күүскэ бэлэмнэнэн, ох курдук оҥостон кэлбит дьоҥҥо биллэн турар кыһыылаах.
Христина Стручкова, акробатика куруһуогун салайаччыта:
—Бастаан орто уонна улахан бөлөхтөр кэтэхтэн кыттыбыттара уонна 2-с, 3-с истиэпэннээх лаурет үрдүк аатын сүкпүттэрэ. Ол кэннэ, Москубаҕа, Казаҥҥа, Кытайга ыҥыртаабыттара. Биһиги Саха сирин улахан сыанатыттан саҕалыырга санаммыппыт. Төрөппүттэрбит көстүүмэнрбитин саба түһэн тиктэриигэ үөрэ-көтө ылсыбыттара, сорохтор Дьокуускайга арыаллаһан кэлистилэр. Бу биһиги курдук суола-ииһэ суох, бас быстар сыаналаах айаҥҥа сөҕүмэр көмө, онон төрөппүттэрбэр махталым муҥура суох. Улуус дьаһалтата сөмөлүөккэ билиэт ыларбытыгар көмөлөстүлэр. Онон барҕа махталбын улуус баһылыгар Иннокентий Николаевич Стручковка, баһылык бастакы солбуйааччытыгар Александра Викторовна Ивановаҕа, Түгэһиир нэһилиэгин баһылыгар Сергей Сергеевич Аликовка, үөрэх управлениетын начаалынньыгын солбуйааччытыгар Маргарита Ивановна Сизыхха, “Хаарчаана” уһуйаан сэбиэдиссэйигэр Сардаана Ивановна Софроноваҕа махтанабыт!
Биллэн турар, бачча бэлэмнэнэн кэлэн баран, кыттыбакка хаалбыппытыттан хомойдубут, ол эрээри, хайыахпытый? “Сэргэлээх уоттара” култуура киинэ балаһыанньабытын өйдөөн, оҕолор акробатическай нүөмэрдэрин видеоҕа уһуллубут, инньэ гынан бэстибээлгэ видеонан кыттыахпыт. Онон култуура киинин дириэктэрин солбуйааччытыгар Екатерина Иннокентьевна Слепцоваҕа, дьүөгэбэр Татьяна Дмитриевна Васильеваҕа махтанабын.
Маны таһынан, биһигини дьокутааттарбыт Виталий Семенович Чикачев, Сергей Афанасьевич Сивцев истиҥник көрүстүлэр, оҕолорго Саҥа дьыллааҕы бэлэх туттардылар.
Мин “Хаарчаана” уһуйааҥҥа физкультура интрукторынан үлэлиибин. Куруһуокка кырачааннар үс саастарыттан дьарыктаналлар. Акробатика – оҕо эт-хаан өттүнэн сайдарыгар, доруобуйалара бөҕөргүүрүгэр олус көмөлөһөр. Миэхэ “Миргилан” бөлөх дьарыктанар, оттон “Осикатал” бөлөх ДЮСШ (дириэктэр Мария Юрьевна Афанасьева) дьарыктанар. Онон оҕолорбутун бары кыттыһан утумнаахтык бэлэмниибит: уһуйааҥҥа, онтон успуорт оскуолатыгар.
Төрөппүттэрбит баар балаһыанньаны сөпкө өйдөөтүлэр. Инникитин да өссө үрдүк үрдэллэри дабайыахпыт диэн саарбахтаабапппын.
