Хайа баҕарар көлүөнэҕэ кэмиттэн кэмигэр киһиттэн таһыччы көрүүлээх, дьоҥҥо кэрэхсэнэр үтүө майгылаах, туруу үлэһит дьон төрөөн-үөскээн ааһаллар. Оннук дьонтон биирдэстэринэн туох да мөккүөрэ суох Уус Алдан улууһун Бэрт Ууһун нэһилиэгиттэн Иванов Александр Петровиһы ааттыахха сөп. Төһө да кылгастык (билиҥҥи кэминэн сыаналаатахха) олордор, Александр кырдьык да чаҕылхайдык олорон, үлэлээн ааспыт эбит. Ыарахан ыарыы буулаабатаҕа буоллар, төһөлөөҕү айара-тутара, оҥороро-ыпсарара хаалбыта буолуой?
Олунньу 17 күнүгэр Александр Петрович Иванов аатынан норуот айымньытын киинигэр “Культура эйгэтин сырдык кэрэһитэ” диэн кинигэ сүрэхтэниитэ буолан ааста. Кинигэ сүрэхтэниитигэр нэһилиэк олохтоохторо, ыалдьыттар уонна Александр Петрович аймахтара, дьиэ кэргэнэ кыттыыны ыллылар. Кинигэни инженер-геолог идэлээх кыыһа Саина Александровна Макарова хомуйан, бэчээккэ бэлэмнээн, сүүрэн-көтөн, “Дани-Алмас” компанияҕа 200 экземплярынан, Уус Алдан культураҕа управлениета, Бэрт Ууһун нэһилиэгин дьаһалтата, Сыырдаахха, Маттаҕа бииргэ үөрэммит доҕотторо, аймахтара, бииргэ төрөөбүттэрэ, кэргэнэ, оҕолоро үбүлээн таһааттардылар.
Кинигэҕэ сыралаһан үлэлэспит оҕолоругар Любаҕа, Саинаҕа, Айнаҕа, тапталлаах кэргэнигэр Маргарита Егоровнаҕа нэһилиэк олохтоохторун ааттарыттан махталбытын тиэрдэбит. Аҕаҕыт, эһэҕит ыраас, сырдык аата үйэлэргэ умнуллубатын туһугар айымньылаахтык, үлэлии-хамныы, айа-тута сылдьыҥ диэн баҕа санааларбытын аныыбыт!
А. Л. Неустроева, Бэрт Ууһун нэһилиэгин Бочуоттаах олохтооҕо, бэтэрээн учуутал.
