2015 сыллаахха Дьокуускайдааҕы педагогическай колледж иһинэн “Битии” үҥкүү бөлөҕө тэриллибитэ. Салайааччы Владимир Александрович Собакин СӨ култууратын туйгуна.
Баара-суоҕа үс эрэ сыл үлэлээбит кэллэктиип диэтэххэ, дьоһун ситиһиилээхтэр:
- XIII бүтүн Аан дойдутааҕы үҥкүү Олимпиадатыгар 7 миэстэни ылары ситиспитэ (2016 с, Москуба).
- «Новое поколение» бэстибээл лауреата (2016 с, Москуба).
- «Үҥкүү этэр, эдэр саас» норуот үҥкүүтүн өрөспүүбүлүкэтээҕи күрэһин лауреата (2016 с, Чурапчы).
- «Свое Решение» III бүтүн Арассыыйатааҕы теаральнай күрэс лауреата (2016 с, Владивосток).
- “Студенческая весна” лауреата (2017 с, Дьокуускай).
- «Ай-тыын» үҥкүү бэстибээлигэр “Бастыҥ балетмейстер үлэтэ” номинация хаһаайына (2017 с, Мэҥэ-Хаҥалас).
- «Созвездие танца» күрэс лауреата (2017 с, Москуба).
- «Снежные узоры» үҥкүү уонна муода норуоттар икки ардыларынааҕы күрэс “Гран-при” хаһаайына (2018 с, Мэҥэ-Хаҥалас).
- Станислав Катаков аатынан үҥкүү кэллэктииптэрин ортотугар ыытыллыбыт «Танцует Якутия» национальнай күрэс-бэстибээл “Гран-при” хаһаайына (2018 с, Дьокуускай).
- “Туймаада ыһыаҕын”, куорат күннэрин кыттыылааҕа.
“Биир саамай улахан ситиһиибит XXIX Аан дойдутааҕы кыһыҥҥы Универсиадаҕа кыттыы буолар. Ааспыт саас бастыҥ бырайыакка күрэс биллэрбиттэрэ. Онно этно-фольклорнай театрализованнай кэнсиэр бырайыагын оҥорон ыыппыппыт. Аҕыс эрэ бырайыак талыллар диэн этэ. Уопсайа араас дойдулартан уонна куораттартан 53 үлэ киирбитэ. Оннук бастыҥнар кэккэлэригэр киирэн хааллыбыт. Ол туһунан бэс ыйыгар эрийэн эппиттэрэ. Универсиада култуурнай бырагыраамматыгар кыттар чиэскэ тиксэммит долгуйуу бөҕө буола сылдьабыт. 20 устудьуон уонна 3 салайааччы буолан барыахтаахпыт. “Благославление земли Олоҥхо” диэн Сахабыт сирин билиһиннэрэр улахан кэнсиэр көрдөрүөхтээхпит”, -- диэн ансаамбыл салайааччыта Владимир Александрович кэпсиир.
