“Эһиги, үүнэр көлүөнэ ыччата төрөөбүт дойдугутун үрдүкү кирбиигэ таһаарыаххыт диэн эрэллээхпин. Үөрэххэ, сайдыыга талаһыыгытын хаһан да сүтэримэҥ. Саҥаны билэ-көрө сатыыр киһи олоҕор куруук ситиһиилээх буолар”, – диэн Айсен Николаев эҕэрдэлээтэ. Оҕолор ааттарыттан Дьокуускай куорат 5-с №-дээх оскуолатын үөрэнээччитэ, “Будущий дипломат – 2018” өрөспүүбүлүкэтээҕи куонкурус, “Будущая дипломатия” норуоттар икки ардыларынааҕы турнир кыайыылааҕа Елизавета Никонова: “Ааһан эрэр сылга Дьокуускайга ыытыллыбыт бастакы норуоттар икки ардыларынааҕы интеллектуальнай оонньууларга кыттыбытым. Бу оонньуулар саха ыччата булугас өйдөөҕүн, киэҥ билиилээҕин Аан дойдуга ааттаппыт буолуохтаахтар диэн эрэнэбин. Биһиги бары үгүс соруктары ситиһэр кыахтаахпытын умнумуохайыҥ”, – диэн эттэ. Бастыҥ үөрэнээччилэр 25000 солк биир кэмнээх стипендиянан бэлиэтэннилэр.
Ил Дархан Харыйатыгар бастыҥ үөрэнээччилэр муһуннулар
Ахсынньы 23 күнүгэр Саха циркатын дьиэтигэр, Ил Дархан Харыйатыгар өрөспүүбүлүкэ араас муннугуттан бастыҥ үөрэнээччилэр: үөрэх туйгуннара, өрөспүүбүлүкэтээҕи, бүтүн Арассыыйатааҕы уонна норуоттар икки ардыларынааҕы таһымнаах олимпиадалар, куонкурустар, научнай-практическай конференциялар, спортивнай күрэхтэһиилэр кыайыылаахтара муһуннулар.
Манна Ил Дархан Айсен Николаев кэргэнинээн Людмила Валерьевналыын, СӨ Бырабыыталыстыбатын бэрэссэдээтэлэ Владимир Солодов, солбуйааччы Ольга Балабкина, Үөрэх уонна билим миниистирэ Владимир Егоров, Култуура уонна духуобунай сайдыы миниистирэ Юрий Куприянов уо.д.а. ыалдьыттаатылар.
