“Агент Мамбо” (16+) киинэ 15,5 мөл солк киллэрбитэ. Cаха киинэтин устуоруйатыгар бу күҥҥэ саамай элбэх харчыны киллэрбит киинэ буолар. Бу ыйга Москубаҕа уонна Санкт-Петербург куоракка көрдөрүөхтэрэ.
Москуба олохтоохторо ыам ыйын 24-25 күннэригэр “Октябрь” киинэ тыйаатырыгар көрүөхтэрэ. Оттон Санкт-Петербург олохтоохторо ыам ыйын 28 күнүгэр “Варшавский экспресс” киинэ тыйаатырыгар көрөр кыахтаннылар. Ону таһынан, киинэ айар бөлөҕүн кытта көрсүһүүлэр буолуохтара. Ыам ыйын 24 күнүгэр маннык көрсүһүүгэ киинэ кириитигэ Юлия Кузищина ыалдьыттыа.
Киинэни Москубаҕа уонна Санкт-Петербурга көрдөрүүнү тэрийээччи Ирина Энгелис СИА-ҕа иһитиннэрбитинэн, бу “Каро Арт” диэн бырайыак көмөтүнэн тэриллэр. “КАРО” киинэ тыйаатырдарын ситимин анал бырайыага буолар. Бу көмөтүнэн эрэгийиэннэр бастыҥ киинэлэрин дойду сүрүн куораттарыгар көрдөрөллөр. Холобур, ааспыт сыллаахха “Кэрэл”, “Костер на ветру” уонна “Его дочь” киинэлэр көстүбүттэрэ.
“Агент Мамбо” 1,7 мөл солк бүддьүөттээх киинэ 15,5 мөл солк киллэрбитэ. Киинэ продюсера Степан Порядин, режиссера Алексей Амбросьев (кырата), артыыстар — Иннокентий Хобуев, Владимир Тимофеев, Виталий Щукин, Альберт Ноговицын, Дмитрий Баишев.
