Киирии

Киирии

Бэс ыйын 19 күнүгэр Дьокуускай куорат Бэтэрээннэрин Сэбиэтэ Тулагы Киллэм сиригэр кырдьаҕас бэтэрээннэригэр анаан ыһыах ыста. Сарсыарда эрдэттэн кырдьаҕастар сахалыы таҥастарын сайбаччы кэтэн уокуруктарынан тустаах түһүлгэлэрин булан, түһүүлэнэн түһүлгэлэрин киэргэтэр түбүгэр түһэллэр, сахалыы астаах сандалы остуолун тардаллар. Бары да настарыанньалара көммүтэ сүрдээх, өр көрсүбэтэх дьон кэпсэлэ-ипсэлэ баһаам.

bahaam

Суруйар үгэспинэн хас биирдии уокурук түһүлгэтин сэмээр кэрийэбин. Ытык кырдьаҕастарбыт талааннарын көрө сөҕөбүн. Сорох түһүлгэлэри кинилэр талааннаах тарбахтарынан оҥоһуллубут иис араас көрүҥнэрэ киэргэтэр. Барахсаттар дьэ талааннаахтар!

bagyn2

bagyn22

bagyn222

bagynanova

Пригород бөһүөлэктэрэ бары биир түһүлгэни төрүттээбиттэр. Мин сахалыы астарынан Аал луук мас моһуонунан оҥоһуллубут бүлүүдэни сөбүлүү, интэриэһиргии көрөбүн. Манна туох-туох суоҕуй? Убаһа, ынах этэ, хаана, хартата, сыата, сахалыы лэппиэскэ, ыһаарыламмыт балык барыта баар.

Оруобуна бириэмэтигэр ыһыах үөрүүлээх чааһа аһыллар. Биһиги биир идэлээхпит “Арчы-Забота” хаһыат суруналыыһа, алгысчыт Александр Лукин сиэри-туому тутуһан, аал уоту оттон, кэлбит ыалдьыттары алгыыр, сири-дойдуну арыылаах алаадьынан, уохтаах кымыһынан күндүлүүр.

bagyn3

Мустубут дьону Дьокуускай куорат бэтэрээннэрин Сэбиэтин бэрэссэдээтэлэ Платон Брызгалов, СӨ бэтэрээннэрин Сэбиэтин бэрэссэдээтэлэ Вильям Иванов, Дьокуускай куорат мээрэ Сардана Авксентьева о.д.а. итии-истиҥ тылларынан эҕэрдэлээтилэр, этэҥҥэ сылдьан эһиил кыайыы 75 сылын үөрэ-көтө, сэргэхтик сылдьан көрсөллөрүгэр баҕа санааларын тиэртилэр.

bagyn4

Любовь Стручкова – Губинскай уокурук дьаһалтатын социальнай отделын начаалынньыга:

-- Дьокуускай куорат бэтэрээннэрин, кырдьаҕастарын ыһыаҕа Тулагы Киллэм территориятыгар миэстэлэнэн ыытыллар буолбута быйыл иккис сыла. Урут уруккуттан элбэх киһини түмэр ыһыах Покровскайдыыр аартыкка ыытыллар этэ.

Бэйэм бэтэрээннэри, кырдьаҕастары кытары үлэлээбитим ыраатта. Сэрии бэтэрээннэрэ, олох сиэринэн, сыллата аҕыйыы тураллар. Бүгүн биһиги уокурукпутуттан 95 саастаах ытык кырдьаҕастарбытын Сунтаар нэһилиэгиттэн төрүттээх Василий Ефремович Александров уонна сэрии кыттыылааҕа Раиса Федоровна Федорованы аҕаллыбыт. Маны сэргэ Октябрьскай уокуруктан 3 ытык кырдьаҕастар кэллилэр.

Бүгүҥҥү ыһыахха куорат бары уокуруктара уонна куорат таһынааҕы нэһилиэнньэлээх пууннар бэтэрээннэрэ кэлэн кыттыыны ыллылар. Быйылгы ыһыах тэрээһинин ыытыы – биһиэхэ Губин уокуругар сүктэриллэн ыыта сылдьабыт. Тэрээһиҥҥэ улахан көмөнү - управабыт баһылыга Айаал Бурцев, Ил Түмэҥҥэ биһиги уокуруктан дьокутааппыт Мария Христофорова уонна Дьокуускай куорат дууматыгар дьокутааппыт Владислав Дмитриев сүрдээҕин көмөлөстүлэр, өйөөтүлэр.

bagyn5

Салгыы Дьокуускай куорат Автодорожнай уокуругун түһүлгэтигэр киирэбин.

Бэтэрээннэр Сэбиэттэрин бэрэссэдээтэлэ Галина Васильевна Сидорова “Бүгүҥҥү түһүлгэбитигэр бары биир киһи курдук кэлэҥҥит актыыбынай кыттыыны ылбыккытыгар махтанабын. Инникитин ыытыллар тэрээһиннэрбитигэр мэлдьи кыттар буолаарыҥ” – диэн баҕа санаатын тириэртэ.

 bagyn6

 Ыһыаҕы быйылгыттан саҕалаан уокуруктарынан уонна куорат таһынааҕы бөһүөлэктэринэн ыытары былааннаабыттар. Ол курдук, быйыл Губин уокуруга саҕалаабыт буоллаҕына эһиил сайыҥҥы ыһыах эстафетатын Тулагы Киллэм бөһүөлэгэ тутта. Дьэ, ити курдук ытык кырдьаҕастарбыт сааһырдыбыт диэн дьиэлэригэр бүгэн олорбокко, олоххо актыыбынай позицияларын көрдөрөн, олох үөһүгэр сылдьаллара киһини үөрдэр. Мэлдьи да маннык чэгиэн-чэбдик, үөрэ-көтө сылдьыҥ дуу диэн кырдьаҕастарбытын алгыыбыт.

Саргылаана БАГЫНАНОВА.

Тарҕат:

Комментарии

Защитный код Обновить