Войти

Войти

Дьокуускайдааҕы балет оскуолатын устудьуонката Саяна Егорова, балерина Галина Уланова пуондатын анал стипендиатынан буолла. Бу туһунан Дьокуускайдааҕы балет оскуолата иһитиннэрэр.

Пуонда 2004 сылтан хореографическай үөрэх кыһаларын талааннаах үөрэнээччилэригэр, устудьуоннарыгар сыл аайы стипендия аныыр. Ол курдук, Аан дойду балетын сулуһа Сергей Полунин, Улахан тыйаатыр прима-балерината Ольга Смирнова, Баварскайдааҕы судаарыстыбаннай тыйаатыр солиската Эльвина Ибраимова, Мариинскай тыйаатыр солиската Кристина Шапран, Улахан тыйаатыр солиската Ксения Жиганшина стипендиатынан буолбуттара.

Оттон А., Н. Посельскайдар аатынан Дьокуускайдааҕы балет оскуолатын бүтэрбит, билигин Суорун Омоллоон аатынан опера уонна балет тыйаатырын солиската   Венера Федотова, опера уонна балет Екатеринбургтааҕы судаарыстыбаннай академическай тыйаатыр артыыската Ангелина Сивцева, Нуучча национальнай балет тыйаатырын артыыската Зоя Дансарунова уонна 3-с куурус устудьуона Иван Матвеев стипендиатынан буолбуттара. Иван Матвеев быйыл  Борис Эйфман аатынан үҥкүү академиятыгар ыҥырыллыбыт.

Саяна талаана үрдүктүк сыаналаммыта кини уһуйааччыларын, РФ уонна СӨ үтүөлээх артыыската Оксана Абрамова уонна Дьокуускайдааҕы балет оскуолатын учууталларын маастарыстыбатын сыанабыла буолар. Саяна сыл аайы ыытыллар “Надежда”, “Дивертисмент” куоҥкурустар хас да төгүллээх лауреата, I российскай-японскай евразийскай куоҥкурус дипломана уо.д.а.

News.Ykt.Ru

Тарҕат:

Добавить комментарий