“ЛИterra” саҥа саайт үлэтин саҕалаата. Электроннай сурунаалы саха суруйааччылара Владимир Федоров, Николай Лугинов уонна Елена Степанова арыйдылар.
“Биһиги Саха сирин норуодунай суруйааччытын Николай Лугиновы кытта “Лиterra” диэн электроннай сурунаалы арыйдыбыт. Маннык курдук бэчээттэммит сурунаал култуура уонна духуобунай сайдыы министиэристибэтин көҕүлээһининэн тахса сылдьыбыта. “Общеписательская газета” хаһыат сабыллыбытын кэннэ талааннаах ааптардары сүтэрэр хомолтолоох этэ. Ол иһин, Николай Лугиновка маннык бырайыагы тэрийэргэ этии киллэрбитим. Саха сирин суруйааччыларын ассоциациятын уонна Духуобунас академиятын кытта баннердары атастастыбыт. Инньэ гынан, олохтоох ааптардар биһигини кытта бииргэ үлэлиэхтэрэ диэммит эрэнэбит”, — диэн сүрүн эрэдээктэр Владимир Федоров кэпсиир.
Саайтка саҕалааччы ааптардар айымньыларын таһаарыахтарын сөп. Сүрүн матырыйааллар ый 1-2 чыыһылаларыгар саҥардыллар буолуохтара. Онон ааптардар үлэлэрин 15-25 чыыһылаларга ыытыахтарын наада.
“Биһиги хас биирдии матырыйаалы көннөрөр кыахпыт суох. Онон, ааптардар бэлэм үлэлэрин ыыталларыгар көрдөһөбүт. Үөхсүү тыллаах айымньылары таһаарбаппыт. Ааптардар үлэлэрин кытта хаартыскаларын уонна бэйэлэрин туһунан кылгас иһитиннэрии ыытыахтаахтар”, – диэн саайтка суруллар.
Саайтка тахсыы босхо, ол эрэн матырыйаал кээмэйигэр хааччахтаах. Ол курдук, поэзияҕа — 15-20 элбэҕэ суох хоһоон эбэтэр поэма. Прозаҕа (кэпсээн, сэһэн эбэтэр арамаан) — биир бэчээт лииһиттэн элбэҕэ суох (арыттаах 40 тыһ бэлиэ эбэтэр тиэкис халыыбынан 20 сирэй). Пьесаҕа — икки аҥаар бэчээт лииһэ. Публицистика, уочарка, литературнай чинчийии, көрүү — бэчээт лииһин аҥарыттан элбэҕэ суох буолуохтаах.
