Кулун тутар 18-22 күннэригэр Дьокуускай куоракка ыытыллар норуоттар икки ардыларынааҕы киинэ бэстибээлигэр, коронавирустан сылтаан тас дойдулартан кэлиэхтээх үгүс ыалдьыттар кэлбэт буолбуттар. Бу туһунан ТАСС иһитиннэрэр.
Ол курдук Японияттан, Польшаттан, Ирантан о.д.а. дойдулартан ыалдьыттар кэлбэттэр. Ол эрэн, “онлайн” быһыытынан кыттыыны ылыахтара. Түөрт омук киһитэ кэлэрэ күүтүллэр. Кинилэр коронавирус тарҕанар кэмигэр Арассыыйаҕа олорбуттар. Быйылгы бэстибээлгэ сүрүн куоҥкуруска уонна документальнай киинэлэр куоҥкуруһугар 18 дойдуттан 50 киинэни көрдөрүөхтэрэ.
Санатар буоллахха, Ил Дархан Айсен Николаев “Инстаграм” социальнай ситимҥэ иһитиннэрбитинэн, кулун тутар 16 күнүттэн 200-тэн элбэх киһилээх култуурунай уонна спортивнай тэрээһиннэри ыытыыга хааччахтааһыннар киирдилэр. Сорох тэрээһиннэр атын форматынан ыытыллыахтара.
