Өрөспүүбүлүкэ күнүгэр сөп түбэһэ, Башкортостан дьахталларга уонна дьиэ кэргэҥҥэ аналлаах “Башҡортостан ҡыҙы” сурунаала Наталья Михалёва-Сайа, итиэннэ Мария Алексеева-Арылы Дуйдаах хоһооннорун тылбаастарын бэчээттээн таһаарда. Тамара Искандерия уонна Гульнара Хальфетдинова тылбаастаабыттар.
“Башҡортостан ҡыҙы” тэрийээччилэрэ: Башкортостан Курултайа, Башкортостан үрдүкү салалтата.
Сүрүн эрэдээктэр — Гульназ Миратовна Кутуева, башкир поэтессата, филолог, суруналыыс, филология билимин кандидата.
Гульназ Кутуева хоһоонноро былырыын уонна быйыл “Күрүлгэн”, “Хатан” сурунаалларга бэчээттэммиттэрэ. Наталья Михалёва-Сайа, Мария Алексеева-Арылы Дуйдаах тылбаастааннар.
Сурунааллар икки ардыларыгар итинник атастаһык таһаарыыны, национальнай СМИлэр ассоциацияларын салайааччытын быһыытынан, “Ситим” медиа бөлөх бас салайааччыта Мария Христофорова көҕүлээтэ.
Ити үлэ чэрчитинэн “Күрүлгэн” сурунаалга Казаҥҥа олорор суруйааччы, Татарстан урамньытын үтүөлээх дьайыксыта, суруйааччы Лев Кожевников “Белая медведица” диэн хотугу омуктар номохторугар олоҕуран суруйбут остуоруйата тылбаастанан тахсыбыта. Ону сэргэ сурунаал саҥа нүөмэригэр башкир, татаар суруйааччыта, Башкортостан норуодунай поэта, Аҕа дойду Улуу сэриитин кыттыылааҕа Назар Наджми хоһооннорун СӨ норуодунай поэта Михаил Елисеевич Тимофеев тылбаастаабыта бэчээттэннэ.
Быйыл Башкортостаҥҥа Назар Наджми төрөөбүтэ 100 сыла киэҥ далааһыннаахтык бэлиэтэнэр.
Афанасий ГУРИНОВ-АРЧЫЛАН.