Бу күннэргэ "Тойон Мүрү" түмсүү биир бастакы чилиэнэ, түмсүү Сыырдаахтааҕы филиалын салайааччыта, музыкант, педагог, Н.Н. Протопоповка үөрэммит биллиилээх мелодист Николай Андросов Москубаҕа Саха Өрөспүүбүлүкэтин Бастайааннай бэрэстэбиитэлистибэтэ 100 сыллаах үбүлүөйүн көрсө биллэрбит Өрөгөй ырыатын айыы куонкуруһугар кыттан, кини ырыата бастыҥынан ааттанна.
Ырыа сахалыы чааһын (нууччалыытын ааптара – С.Прачев) эмиэ биир дойдулаахпыт – Бээрийэттэн төрүттээх хомоҕой хоһоонньут, талааннаах тылбаасчыт Валентина Комиссарова-Күлүмүрэ тылбаастаабыт. Николай кэпсээбитинэн, куонкурус туһунан киниэхэ өссө биир дойдулаахпыт – СӨ үтүөлээх артыыската Лариса Троева эппит. Оттон ырыаһыт Владлена Бурнашева-Сахаайа быйыл күһүн В. Комиссаровалаах тиэкистэрин аҕалан биэрбитин, Николай олус түргэнник иэйиитэ киирэн, ырыатын айан кэбиспит.
Аранжировкатын СӨ композитордарын Союһун бэрэссэдээтэлэ Николай Михеев бэйэтинэн (уус алданнар күтүөппүт, "Кэнчээрим" биир бастыҥ ырыаһыта Вероника Пухова-Михеева кэргэнэ) оҥорбута кэрэхсэбиллээх. Толоруутун запевын Сахаайа уонна салгыы Николай Андросов бэйэтэ, Кирилл Матвеев, Николай Роббек, Иннокентий Оҕочооноп – бары да биллэр, үчүгэй куоластаах уолаттар толорбуттар. Хомуска Уус Алдан Курбуһаҕыттан сыдьааннаах А. Аммосов доҕуһуоллаабыт. Нуотатын көмпүүтэргэ биһиги "Тойон Мүрү" түмсүүбүтүн кытта ыкса сибээстээхтик үлэлээн, мелодистарым ырыаларын нуотаҕа түһэрэн биэрэн, хаһыакка таһаартарарбар, кинигэҕэ киллэрэрбэр кыаҕы биэрбит "Өрөспүүбүлүкэ бастыҥ педагога" бэлиэлээх Николай Слепцов-Шансон оҥорбут.
Онон, биһиги дьоммут айбыт, үлэлэспит ырыалара Саха сирин уонна Улуу Москубаны үлэҕэ-хамнаска, култуура, наука сайдыытыгар, араас омуктары кытта доҕордуу сыһыаны олохтуур, Москваҕа олохсуйбут Саха сирин дьоно дойдуларын ахтар саныыр тэрээһиннэригэр, ыһыахтарыгар ылланар Өрөгөй ырыатын айбыттарынан "Тойон Мүрү" түмсүү Коля бастакы учуутала Н.Н. Протопопов үлэтин, улууспут аатын үрдүк үрдэлгэ таһаарбыттарынан итии-истиҥ эҕэрдэбитин, барҕа махталбытын тиэрдэбит!
Манна бэлиэтээн эттэхпинэ, Николай Андросов "Дьол тааһа" ырыата (толорооччу Кирилл Матвеев) соторутааҕыта "Үрдэл" бириэмийэҕэ "Көрөөччү биһирэбилэ" анал аакка тиксибитэ.
Василий Парников, "Тойон Мүрү" түмсүү салайааччыта
