Дьокуускайга «Сирэктэ – нить, связующая века» аҕыйах ахсааннаах хотугу төрүт омуктар быыстапкалара арылынна

Саха Өрөспүүбүлүкэтин Национальнай ойуулуур-дьүһүннүүр түмэлигэр «Сирэктэ – нить, связующая века» аҕыйах ахсааннаах хотугу төрүт омуктар быыстапка-лабораториялара арылынна.

Бу ураты быыстапка атырдьах ыйын 21 күнүгэр диэри үлэлиэҕэ. Манна кэлэн көрөөччүлэр эбээннэр, эбэҥкилэр, долганнар, юкагирдар уонна чукчалар уус-уран нэһилиэстибэлэрин кытта билсиэхтэрэ. Экспозицияҕа 70 тахса норуот маастардарын уус-уран оҥоһуктара турдулар: XX үйэ саҕаланыытын эрдэҕинээҕи эбэҥки норуотун түөһүн симэҕэ, суумкалар, түү көбүөрдэр уо. д. а.

Маны сэргэ, аҕыйах ахсааннаах хотугу төрүт омуктар худуоһунньуктарын хартыыналара бааллар. Быыстапка Арассыыйа норуоттарын норуодунай ускуустубаларын уонна матырыйаалынайа суох култуурунай нэһилиэстибэлэрин сылыгар ананан турда.

«Хас биирдии норуот бэйэтин төрүт таҥаһын-сабын көрдөрөр. Өрөспүүбүлүкэбит аҕыйах ахсааннаах хотугу төрүт норуоттар таҥастарын лабораторията улахан инникилээх диэн эрэнэбин. Биһиги бу тэриллиибит аата-суола дойдубут бары муннугар иһилиннин!» - диэн Өрөспүүбүлүкэ Судаарыстыбаннай мунньаҕын Аҕыйах ахсааннаах хотугу төрүт норуоттар уонна Арктика дьыалаларын боппуруостарыгар бастайааннай кэмитиэтин бэрэссэдээтэлэ Елена Голомарева быыстапка үөрүүлээх аһыллыытыгар эҕэрдэ тылын эттэ.

Оттон Өрөспүүбүлүкэ Култуураҕа уонна духуобунай сайдыыга миниистирин солбуйааччыта Владислав Левочкин: «Биһиги маастардарбыт өрөспүүбүлүкэбит аатын өрүү үрдүк таһымҥа көрдөрөллөр. Төрүт таҥас-сап лабораторията уопсастыбаннай олоххо көхтөөхтүк кыттарыгар баҕарабын! Биһиги маннык сүҥкэн суолталаах тэрээһиннэргэ кыттыыгытын өрүү өйүүр буолуохпут. Бу чахчы даҕаны биһиги үтүө үгэстэрбитин харыстыырга сүдү кылаатын киллэрэр»,– диэн эҕэрдэлээтэ.