Бүгүн Санкт-Петербург куоракка олохтоох бириэмэнэн 15.00 чааска «Сахалыы истиил. Үйэлээх баай уонна айымньы» быыстапка аһыллыыта буолуоҕа. Бу - Саха сирин Ем. Ярославскай аатынан Хотугу норуоттар устуоруйаларын уонна култуураларын холбоһуктаах түмэлин уонна Арассыыйатааҕы этнография түмэлин кыттыгас бырайыактара.
Экспозиция көрөөччүлэри саха норуотун ураты ускуустубатын билиһиннэрэр соруктаах. Ол да иһин быыстапкаҕа, бастатан туран, саха төрүт таҥаһа туруоруллубут. Ол иһигэр Дьааҥы улууһугар саха-боронсуус эспэдииссийэтэ (2004-2019 сс.) булбут XVIII үйэтээҕи саха эр киһитин таҥаһын реконструкцията баар.
Өссө биир сыаналаах экспонатынан норуот маастара Анна Зверева тикпит XIX үйэтээҕи дьахтар таҥаһын кэмпилиэгэ буолар. Ааспыт сыл сэтинньитигэр бу таҥаһы Саха сирин аатыттан Арассыыйатааҕы этнография түмэлигэр төрүттэммитэ 120 сылынан бэлэхтээбиттэрэ.
Маны сэргэ, быыстапкаҕа саха омук алтантан, сэлии муоһуттан, туойтан, туостан, мастан илии оҥоһуктарын, киэргэлин-симэҕин, иһитин-хомуоһун көрүөххэ сөп. Быыстапка муус устар 16 күнүгэр диэри үлэлиэҕэ.
Сонун төрдө: CӨ Бырабыыталыстыбатын уонна Ил Дарханын пресс-сулууспата
