Өксөкүлээх Өлөксөй аатынан норуоттар доҕордоһууларын дьиэтигэр, «Россия» кинозалга «Пути великих свершений» цикл «Дойти до края. Сибирский континент» диэн ааттаах бастакы киинэтин көрдөрдүлэр. Бу киинэни Хаҥалас, Өлүөхүмэ, Таатта, Өймөкөөн, Томпо, Аллараа Халыма уонна Уус Алдан оройуоннарыгар, Дьокуускай куоракка устубуттара. Сорох сыаналары Санкт-Петербург, Москва, Лозанна (Швейцария) куораттарга, Чукотскай автономнай уокурукка, Анадырьга уонна Дежнев тумуһугар уһулбуттара.
Устуоруйа чахчытын көрдөрөр документальнай киинэни СӨ Ил Дарханын сүбэһитэ, бырайыак салайааччыта Георгий Никонов көрдөрбүт.
Георгий Дмитриевич бэлиэтииринэн, бу элбэх сиэрийэлээх научнай-популярнай хартыына Саха АССР төрүттэммитэ 100 сылыгар ананар уонна СӨ Ил Дархана Айсен Сергеевич Николаев көҕүлээһининэн уһуллубут киинэнэн буолар. Билигин бу хартыына иккис чааһын устарга бэлэмнэнии үлэтэ саҕаламмыт.
Өксөкүлээх Өлөксөй аатынан норуоттар доҕордоһууларын дьиэтэ бу киинэ олоххо киирэригэр тус көмөлөөх этэ. Ол курдук, Таатта улууһун Туора Күөл нэһилиэгэр «Ааллаах Үүн таһаҕасчыттарын» устууга, былыргы сылгыһыттар халыҥ таҥастарын норуодунай уус-уран оҥоһук маастара Изабелла Элякова кэллиэксийэтиттэн тиксэрбиттэрэ. Онтон Карл Маркс искибиэригэр уһуллууга Хатас маастар дьахталлара кыттыыны ылбыттара.
Өксөкүлээх Өлөксөй аатынан норуоттар доҕордоһууларын дьиэтигэр киинэни Дьокуускай куорат олохтоохторо, национальнай-култуурунай түмсүүлэр, Саха норуоттарын Эдэр ыччакка Ассамблеятын бэрэстэбиитэллэрэ көрдүлэр. Көрөөччүлэргэ анаан Сюзанна Седалищева «Ааллаах Үүн таһаҕасчыттара» хаартыскаларын быыстапката тэриллибитэ.
Өксөкүлээх Өлөксөй аатынан норуоттар доҕордоһууларын дьиэтин пресс-сулууспатыттан
