Бэс ыйын 20-26 күннэригэр IV Норуоттар икки ардыларынааҕы «Олоҥхо дойдутугар Юнеско шедеврдэрин көрсүһүүтэ» бэстибээл ыытылла турар. Бэстибээл үөрүүлээх аһыллыыта Үөһээ Бүлүүгэ Олоҥхо ыһыаҕын бастакы күнүгэр буолбута. Бэс ыйын 23 күнүттэн саҕалаан бэс ыйын 26 күнүгэр диэри ыраах сиртэн кэлбит ыалдьыттар киин куорат тыйаатырдарыгар маастар-кылаастары, кэнсиэртэри, испэктээктэри көрдөрүөхтэрэ. Бүгүн Өрөспүүбүлүкэтээҕи медиа-киин саалатыгар кыттааччылары кытта пресс-кэмпириэнсийэ тэрилиннэ.
Кэпсэтиини СӨ култуураҕа уонна духуобунай сайдыыга миниистирин солбуйааччыта Марина Силина уонна СӨ судаарыстыбаннай сүбэһитэ Андрей Борисов иилээн-саҕалаан ыыттылар. Андрей Саввич маннык бэстибээл аан дойдуга ханна да суоҕун киэн туттан эттэ.
Бэстибээли тэрийиигэ уруккуттан үлэлэһэр, Саха сиригэр хасыһын да кэлэ сылдьар тыл билимин хандьыдаата, Арассыыйа наукаларын академиятын А.М.Горькай аатынан институтун старшай научнай үлэһитэ Наталья Лидова тэрийээччилэргэ бэстибээли сырыы ахсын тупсаран, уларытан, кэҥэтэн ыыталларын, олохтоохтор өрүү аламаҕайдык көрсөллөрүн иһин олус истиҥ махтал тылларын эттэ.
Армения «Кайт» култуура киинин салайааччыта Корюн Давтян саха омук олоҥхотун хайдах маннык үрдүк таһымҥа таһаарбытын олус сөҕөрүн, ымсыырарын уонна биһигиттэн элбэххэ үөрэммитин билиннэ. Маны таһынан, кини Олоҥхо ыһыаҕар элбэх дьон олоҥхону сүрдээҕин сэҥээрэн истэрин сөхпүтүн кэпсээтэ.
Саха сиригэр бастакытын кэлбит Монголия култууратын туйгуна, «Түмэн-Эх» ырыа уонна үҥкүү ансаамбылын артыыһа Хадхуу Дадмин, Калмыкия өрөспүүбүлүкэтин «Тюльпан» судаарыстыбаннай ырыа уонна үҥкүү ансаамбылын артыыһа Кутлан Мукубенов маннык бэстибээлгэ кыттыы кинилэргэ улахан дьол буоларын бэлиэтээтилэр уонна махтаннылар.
Суруналыыстар көрдөһүүлэринэн, СӨ култуураҕа уонна духуобунай сайдыыга миниистирин солбуйааччыта Марина Силина бэстибээл бырагырааматын кылгастык билиһиннэрдэ. Кини сиһилии бырагыраама министиэристибэ саайтыгар баарын уонна бэс ыйын 26 күнүгэр бэстибээли түмүктүүр гала-кэнсиэркэ билиэт бүтэн эрэрин туһунан иһитиннэрдэ.
Бүгүн, бэс ыйын 23 күнүгэр, киэһэ 18.00 чаастан Саха тыйаатырын иннигэр «Улуу Кудаҥса» испэктээги босхо көрдөрүөхтэрэ, оттон киэһэ 19.00 чаастан Индия Санскрит куттиятам тыйаатырын «Божественная Рамаяна. Беседа Ситы и Ханумана» (солист Нангьяр-куту Синдху Каламандалам) икки чаастаах туруоруута буолуоҕа.
Төлөбүрдээх тэрээһиннэргэ билиэти https://sakhaconcert.ru саайтан онлайн-атыылаһыахха сөп.
Бэйэ корр.
