Саха сирин дьахталлара «Хоту тент» тэрилтэни уонна «Кэрэ» фабриканы кытта тэҥҥэ кыттыгас хомуурга тиийбит уолаттарга анаан, таҥас тигэн эрэллэр. «Якутия с тобой!» көмө ыстаабын бэрэссэдээтэллэриттэн биирдэстэрэ Ирина Саввина эппитинэн, кыһамньылаах, уопсастыбанньык дьахталлар аптечка, утуйар мөһөөччүк, олорор сидиэнньэ уонна балаклава тигэллэр.
Былааҥҥа тигэр таҥас көрүҥүн элбэтии баар. Ол эрээри, оҥорон таһаарыыга билиҥҥитэ брезент, стропа быа, камуфляж матырыйаал, синтепон, боолдьох, армированнай хараҥа өҥнөөх саптар, флис уонна пенофол тиийбэттэр эбит.
Онон, Саха сириттэн анал байыаннай эпэрээссийэҕэ ыҥырыллан барбыт саллааттарбытыгар анаан үлэлии-хамныы сылдьар волонтердарбытыгар көмө оҥорон, «Я с тобой!» көмө ыстаабыгар матырыйыыллары тиксэриэххитин сөп. Пуун аадарыһа: Дьокуускай куорат, Орджоникидзе уулуссатын 10-с нүөмэрдээх дьиэтэ, киирии аан хаҥас ойоҕоско баар.
