Өрөспүүбүлүкэ оперативнай ыстааба анал байыаннай дьайыыларга кытта сылдьар биир дойдулаахтарбытыгар өрөспүүбүлүкэ уонна улуус хаһыаттарын тиэрдиэҕэ.
Ол туһунан бүгүҥҥү брифиҥҥэ ыстаап бэрэссэдээтэлин солбуйааччыта, Өрөспүүбүлүкэтээҕи судаарыстыбаннай хааччыйыы кэмитиэтин салайааччыта Дмитрий Лепчиков иһитиннэрдэ. «Маны сэргэ, ыстаап Саҥа дьылга диэри госпиталларга бородуукта наборун тиэрдиэҕэ. Бастакы баартыйа өрөспүүбүлүкэ опорнай пууннарыгар барбыта. Байыастартан экипировкаҕа сайаапка киирэ турар. Онон, өрөспүүбүлүкэ өттүттэн хааччыйыы салҕанар», – диэн кини эбэн эттэ.
Санатар буоллахха, «Арассыыйа почтата» РФ Оборонаҕа министиэристибэтин кытта анал байыаннай дьайыыларга сылдьааччылар ааттарыгар баһыылка тутуутун тэрийбитэ. Суруктары уонна баһыылкалары «Арассыыйа почтатын» чугастааҕы салаатын нөҥүө «103400, город Москва-400» аадырыска байыаннай чаас нүөмэрин ыйан туран ыыталлар. Байыаннай чаас нүөмэрин сулууспаҕа ыҥырбыт байыаннай комиссариаттан билиэххэ сөп.
Сонун төрдө: CӨ Бырабыыталыстыбатын уонна Ил Дарханын пресс-сулууспата
