Бу хаартыскаларга ахсынньы 2 күнүгэр Москубаҕа Russian Creative Awards диэн Арассыыйа креативнай индустриялар эйгэлэригэр национальнай бириэмийэтин туттарыы түгэннэрэ көстөр.
Билэргит курдук, Саха сирэ Татарстаны, Красноярскай кыраайы, Аллараа Новгород уонна Тюмень уобаластарын кэннигэр хаалларан, “Креативнай эрэгийиэн” диэн номинацияҕа кыайда.
Өрөспүүбүлүкэбит 100 сыллаах үбүлүөйдээх сылын улуу Арассыыйа саамай креативнай эрэгийиэнэ диэн ааты сүгэн, чахчы улахан бэлэхтээх түмүктээн эрэбит.
Бириэмийэни Ил Дархан Айсен Николаевка былырыыҥҥы кыайыылаах Москуба куорат мээрэ Сергей Собянин: “Эһиги, чахчы, креативнай уонна талааннаах дьоҥҥут”, – диэн ис сүрэҕиттэн эҕэрдэлээн туран, өрөгөйдөөх быһыыга-майгыга туттарда.
Харда тылыгар Айсен Сергеевич: “Манна урут киинэ устабыт, көмпүүтэр оонньуута оҥоробут диэтэххэ, сонньуйар, күлэн кэбиһэр этилэр. Онтон 2018 с. киинэбит Москубатааҕы Аан дойдутааҕы киинэ бэстибээлигэр Гран-прини ылбытыгар, биһиги оонньууларбыт аан дойдуга тахсан, хампаанньаларбыт дуолларынан миллиардер буолбуттарыгар, креативнай индустриялар сайдыыларын кэнсиэпсийэтэ оҥоһуллубутугар аны дьон Саха сириттэн саҥаттан саҥа ситиһиилэри кэтэһэр буоллулар. Саха сирэ Арассыыйаны кытта аан дойдуга саҥа креативнай өйдөбүллэри киллэриэҕэ”, – диэтэ.
Иккис хаартыскаҕа Саха сирин Арассыыйа бастыҥ креативнай эрэгийиэнэ диэн ааттаабыт өрөгөйдөөх түгэҥҥэ тиийэрбитигэр суол тэлбит саха уолаттара туралларын көрөн киһи үөрэр. Өйбүт күүһүнэн Арассыыйа чыпчаалыгар тахсыахпыт диэн күн бэҕэһээҥҥэ диэри түһээн да баттаппатахпыт чахчы.
Владимир Степанов.
