Саха атынан Москубаҕа тиийэ айаннаан, төрүт боруода сылгыбытын аар-саарга аатырдыбыт сылгыһыт, Өймөкөөн улууһун бочуоттаах олохтооҕо Дугуйдан Винокуров өссө биир ураты айаҥҥа турунаары ох курдук оҥосто сылдьар.
Бу сырыыга кини Өймөкөөн Үчүгэйиттэн Магадан уобалаһын Сэйимчээн диэн куораттыы тииптээх бөһүөлэгэр тиийиэхтээх. Айан уһуна – 700 км. Айан аата “Улуу өбүгэлэрбит суолларынан” диэн ааттаммыта мээнэҕэ буолбатах. Алексей Кулаковскай-Өксөкүлээх Өлөксөй уонна Өймөкөөн аатырбыт меценат атыыһыта Николай Кривошапкин айаннаабыт аартыктарын сөргүтэр, улуу дьоммутун үйэтитэр сыаллаах. Дугуйдан бу айанын быйыл Өймөкөөҥҥө буолуохтаах Олоҥхо Ыһыаҕар аныыр.
Этэҥҥэ буоллаҕына, биир ыйга суоттаммыт айан уратыта – Дугуйдан бу тухары балаакката суох, аһаҕас халлаан анныгар утуйа, аһыы сылдьыахтаах! Былыргы өбүгэлэрбит курдук. Дугуйдан бу айанын ааспыт сырыыга курдук А.В. Горохов бэрэссэдээтэлэ Нуучча географическай уопсастыбатын Саха сиринээҕи салаата уонна Өймөкөөн улууһун дьаһалтата өйүүллэр. Уолбут арыалдьыттардаах буолуоҕа. Спутниковай сибээстээҕэ буоллар, бэрт буолуо эбит.
Санатан эттэххэ, өрөспүүбүлүкэ 100 сыла туоларыгар сыһыаран, саха сылгылара дойду тэбэр сүрэҕэр диэри 11 тыһ. км айаннаабыттара. Магадаҥҥа сырыы ону ситэрэн-хоторон биэриэҕэ. Бу айаҥҥа Дугуйдан эрэллээх ата Хоҥорунан турунар. Ону тэҥэ Чэпчэкичээн диэн саҥа сылгы улахан айаҥҥа уһуйуллуо.
Бэйэ кэр.
