Өрөспүүбүлүкэҕэ тэйиччи сирдэргэ тутуллар сылгы баазаларын тутуу ороскуотун сабар мэхэньиисим үлэлиир. Көмөнү ылыыга сүрүн ирдэбилинэн эспэртиисэни ааспыт бырайыак-симиэтэ докумуонун туттарыы буолар.
Ил Дархан Айсен Николаев быһа эпииргэ бу хайысхаҕа үбүлээһини улаатыннарар туһунан эттэ. Ол курдук, матырыйаал сыаната үрдээбитинэн, субсидия кээмэйин улаатыннарар ирдэнэрин тоһоҕолоото. Онон, регион салалтатыгар туһааннаах сорудах бэриллиэҕэ.
«Сылгыны үөрдээн иитии тыа хаһаайыстыбатын ордук барыстаах салаата буолар. Сатаан дьарыктанар дьону өйүөх кэриҥнээхпит», – диэтэ Айсен Сергеевич.
Быйыл 3 мөл. солкуобайдаах судаарыстыба өйөбүлүн 19 хаһаайыстыба ылбыт. Бу сыалга барыта 57 мөл. солк. көрүллүбүт. 2017 сылтан 2022 сылга диэри көмөнү 277 хаһаайыстыба туһаммыт. Билигин өрөспүүбүлүкэҕэ 784 сылгы баазата баар эбит. Салгыы өссө 416 бааза тутуллара ирдэнэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата
