Төрөөбүт тыл күнүгэр үрдүкү салалтаттан үөрүүлээх сонуннар

Бэҕэһээ, олунньу 13 күнүгэр, Сахабыт сирин үрдүнэн Төрөөбүт тыл уонна сурук-бичик күнэ өрө көтөҕүллүүлээхтик бэлиэтэннэ. Улуустарга да, киин куоракка да, үгүс тэрилтэлэргэ сахалыы таҥнан-симэнэн араас хабааннаах тэрээһиннэри ыыттылар, үөрдүлэр-көттүлэр. Ордук чуолаан, Сунтаар улууһугар Төрөөбүт төрүт тыл сылын үөрүүлээхтик арыйыы үрдүк таһымҥа ааста.

Дьокуускайга төрөөбүт тылы уруйдуур икки улахан тэрээһин буолан ааста. Үрдүкү салалта кыттыылаах дьоро киэһэ Суорун Омоллоон аатынан Опера уонна балет тыйаатырыгар буолла. Оттон уопсастыбанньыктар Өксөкүлээх Өлөксөй аатынан Норуоттар доҕордоһууларын дьиэтигэр муһуннулар. Сорох түргэн-тарҕан туттунуулаах дьон хайатыгар да астына сырыттылар.

Сарсыардаттан социальнай ситимнэринэн тохтоло суох тарҕанар эйэҕэс эҕэрдэлэһиилэр, төрөөбүт тылга анаммыт айымньылар, уһулуулар киэһэтин үөрүүлээх тэрээһиннэр хаартыскаларынан уонна үрдүкү салалта иһитиннэрбит үтүөкэн сонуннарынан солбулуннулар.

Ол курдук, Ил Дархан Айсен Николаев саҥа сылтан Тыллары сайыннарар уонна харыстыыр тус сыаллаах судаарыстыбаннай бырагырааманы үбүлээһин кээмэйэ икки төгүл улаатан, былырыын 56 мөл. эбит буоллаҕына, аны 100 мөлүйүөн буолбутун өссө төгүл санатта. Маны сэргэ, Айсен Сергеевич саха тылын учууталларын сийиэһигэр ылыллыбыт резолюция олоххо киириитин тус хонтуруолыгар ыларын мэктиэлээтэ уонна Үөрэх министиэристибэтигэр Дьокуускайга толору сахалыы тыыннаах, эйгэлээх биир оскуоланы тэрийэргэ сорудахтаата.

Ил Дархан этиитин Ил Түмэн бэрэссэдээтэлэ Алексей Еремеев этиитэ өссө үчүгэйдик чиҥэтэн биэрдэ. Кини Айсен Николаев таһаарбыт Ыйааҕынан тохсунньу 1 күнүттэн өрөспүүбүлүкэ таһымыгар оҥоһуллар сокуон бары барыллара икки судаарыстыбаннай тылынан суруллан  кулун тутарга буолар сиэссийэҕэ икки тылынан ылыллыахтарын туһунан биллэрдэ. Алексей Ильич этэринэн, бу саха тылын туттуллар эйгэтэ кэҥииригэр улахан дьайыыылаах.

Төрөөбүт тыл күнүгэр этиллибит сүрүн үөрүүлээх сонуннар манан бүппэттэр. Ил Дархан дьаһалынан төрөөбүт тылы сайыннарыыга, оҕолору төрөөбүт тылга уһуйууга, учууталлары уонна уһуйааччылары төрөөбүт тылынан иитиигэ уонна үөрэтиигэ көҕүлээһиҥҥэ быйыл элбэх үлэ ыытыллыахтаах.  

Бэйэ кэр.