Өймөкөөҥҥө ыытыллыахтаах Олоҥхо ыһыаҕар бэлэмнэнии хаамыыта быстар мөлтөх диэн бырабыыталыстыба мунньаҕар эттилэр.
Төһө эмэ ыһыаҕы тэрийиигэ үп-харчы толору көрүллүбүтүн үрдүнэн, Өймөкөөн улууһун баһылыга Иннокентий Сивцев уонна улуус дьаһалтата үлэлэрэ бытааныттан, ыһыахха диэри бэлэмнэнии үлэтэ ыһыллар кутталлаах.
Зампред Сергей Местников “Өрөспүүбүлүкэ өттүттэн туох баар үбүлээһини ыыппыппыт. Ону улуус дьаһалтатын өттүттэн кыайан дьаһайбакка олороллор. Ыһыах буолара 2,5 ый эрэ хаалла, онон үлэлэри 2-3 төгүл түргэтитиэххэ наада. Бачча улахан тэрээһини тэрийиигэ улуус баһылыга бэйэтинэн уонна улуус дьаһалтата тус эппиэтинэһи сүгэллэр. Онон муниципальнай хантыраактар туолууларын хонтуруолун күүһүрдүҥ!”, - диэн сэмэлээтэ.
Тутуулары ыытыыга хантыраак түһэрсиллибит эбит да, күн бүгүн үлэ барбакка турар, тутуу матырыйаалларын тиэйии графиктан хаалан иһэр. Кулун тутар 31 күнүгэр диэри бэдэрээччиттэр матырыйааллары барытын тиэйиэхтээхтэр этэ да, сол курдук суох. 4 эбийиэги тутууга, ол иһигэр 512 миэстэлээх ипподрому тутууга муниципальнай хантыраагы дьаһалта дьэ кэлэн өйдөнөн түһэрсэ сатыы сылдьар. Хапытаалынай өрөмүөҥҥэ анаан үбү өссө былырыын тыырбыттар. Томторго уһуйааны уонна түмэли эрэ өрөмүөннээбиттэр, оттон ДЮСШ сол өрөмүөнэ суох тураахтыыр. Онон тутуу министиэристибэтин өттүттэн хонтуруол суоҕа эмиэ ыйылынна.
Санатар буоллахха, Өймөкөөн Томторугар өрөспүүбүлүкэтээҕи XVI Олоҥхо ыһыаҕа от ыйын 1-2 күннэригэр ыытыллыаҕа.
Бэйэ кэр.
