Нуучча тылыгар уонна математикаҕа (базовай таһым) СКЭ түмүгэ билиннэ.
Былырыыҥҥыга холоотоххо, быйыл түмүк быдан тупсубут. Саха сирин 12 выпускнига нуучча тылыгар муҥутуур 100 баалы ыллылар. Санаттахха, былырыын 7 выпускник 100 баалы ылбыта.
Үрдүк баалы ылары ситистилэр: Амма улууһун Маай орто оскуолатын выпускнига Инесса Адамова, Кэбээйи Мастааҕын орто оскуолатын выпускнига Сандаара Саввинова, Сунтаардааҕы политехническэй лиссиэй-интэринээт выпускнига Феврорния Саввинова, Мииринэй куорат 23-с №-дээх оскуолатын выпускнига Полина Корчагина, Нерюнгри 2-с №-дээх гимназиятыттан Илья Манохин, Нерюнгри 24-с №-дээх Информационнай-технологическай лиссиэйиттэн Иван Спицын, Нерюнгри 1-кы №-дээх гимназиятыттан Мария Савкина, Дьокуускай куораттааҕы лиссиэй выпускнига Нарыйаана Кириллина, Дьокуускай 23-с №-дээх оскуолатыттан Влада Долженко, Өрспүүбүлүкэ лиссиэй-интэринээтиттэн Сардаана Егинова уонна Давир Дьяконов, Норуоттар икки ардыларынааҕы Арктическай оскуола выпускнига Евдокия Николаева. Нерюнгри выпускниктара Мария Савкина уонна Илья Манохин номнуо иккис эксээмэннэрин сүүстүү баалга суруйдулар.
Санатар буоллахха, Ил Дархан Айсен Николаев ыйааҕынан, сүүс баалы ылбыт выпускниктар уонна кинилэри бэлэмнээбит учуутал 100 тыһ. солк. ылаллар.
