Сахабыт сиригэр улаата-сайда сатыыр кыра нэһилиэнньэлээх пууннар элбэхтэр. Олортон биирдэстэрэ - Уус Алдан улууһун Бороҕон нэһилиэгин Арыы-Тиит бөһүөлэгэ (учаастага). Манна сотору өтөрүнэн буолбатах улахан сэргэхсийии буолуоҕа. Ол курдук, ыһыахха Арыы-Тииттэн төрүттээх Гаврил Шепелев обургу оҕолорго анаан «Модун Мохсоҕоллор» диэн күрэҕи тэрийэн ыытыаҕа.
- Билигин уолаттары успуорка уһуйуу, өй-санаа, эт-сиин өттүнэн иитии хаһааҥҥытааҕар да суолталаах. Бэйэм Арыы-Тииккэ улааппыт буоламмын, кыра сиргэ оҕо баҕатын хоту успуордунан эбэтэр төрүт көрүҥүнэн дьарыктанар усулуобуйата суоҕун өйдүүбүн. Маннааҕы оҕолор алын сүһүөх кэннэ атын сиргэ баран үөрэнэллэр. Бөһүөлэги уу ылар буолан, улахан тутуу барбат. Успуорт саалата диэн суох. Онон уолаттары успуорка угуйар, арыгы-абааһы суолуттан куоттарар туһугар бу күрэҕи тэрийэргэ сананным. Күрэхтэһии «Дыгын оонньууларын» халыыбынан алта көрүҥүнэн 15-18 саастаах уолаттар ортолоругар ыытыллыаҕа. Бириис пуондата билиҥҥитэ – 50 тыһ. солк. Хас биирдии көрүҥҥэ кыайыылаах, ону таһынан уопсай түмүгүнэн үс сүрүн кыайыылаах баар буолуоҕа. Арыы-Тиит ыһыаҕар 100 кэриҥэ ыалдьыт кэлэрэ сабаҕаланар. Бу учаастак таһымыгар элбэх киһи диэн буолар. Түгэнинэн туһанан, үтүө дьыалаҕа кыттыспыт успуонсардарбытыгар: "InteRoom Kids" онлайн-маҕаһыыҥҥа, "Мясной двор", "СеверГазАвто ГБО", "Автоспас", "Фото-декор" тэрилтэлэргэ, Арыы-Тииттэн төрүттээх уонна олохтоох дьоммутугар ис сүрэхпиттэн махтанабын, - диэн тэрийээччи өрө көтөҕүллэн кэпсээтэ.
Гаврил Шепелев билигин Тулунатааҕы «Сайдыы» сынньалаҥ киинигэр уус-уран салайааччынан үлэлиир. Кини улааппыт дойдутун инникитин, кэскилин туһугар, бэйэтин тула эдэр ыччаты уонна орто көлүөнэ дьону түмэн, маннык тэрээһини көҕүлээн тэрийэн эрэрэ олус хайҕаллаах. Тэрийээччи баҕатын хоту, "Модун Мохсоҕоллор" Арыы-Тииттэн сылын ахсын көтөн тахсыахтара диэн эрэнэбит.
Бэйэ кэр.
