Бэҕэһээ, бэс ыйын 27 күнүгэр, дойду бэрэсидьиэнэ Владимир Путин Кириэмил Собуордааҕы болуоссатыгар Евгений Пригожин салайааччылаах “Вагнер” чааһынай байыаннай хампаанньа өрө туруутун кэмигэр бэрээдэги көрбүт-истибит, хааччыйбыт Оборуона министиэристибэтин, Росгвардия, ФСБ, ИДьМ уонна ФСО байыаннай сулууспалаахтарын мунньан, тыл эттэ. Болуоссакка СОБР, ОМОН уонна ДПС бэрэстэбиитэллэрэ эмиэ бааллара.
Бэрэсидьиэн Владимир Путин байыаннайдар уонна быраабы араҥҥаччылааччылар “аймалҕан суолун бүөлээн”, гражданскай сэриини тохтоппуттарын, Арассыыйа норуота уонна сэбилэниилээх күүстэрэ өрө турааччылары өйөөбөтөхтөрүн анаан бэлиэтээтэ уонна хорсуннарын, норуот туһугар бэриниилэрин иһин махтанна.
В.Путин эппитинэн, тустаах уорганнар түргэнник уонна лоп-бааччы үлэлээбиттэрин түмүгэр, эйэлээх дьон ортотугар өлүү-сүтүү тахсыбатах, онтон сылтаан Украинаҕа анал байыаннай эпэрээссийэҕэ кытта сылдьар чаастары хамсаппатахтар.
Итини этэн туран, бэрэсидьиэн бэс ыйын 24 күнүгэр ытык иэстэрин толору сылдьан өрө турааччылар илиилэриттэн өлбүт лүөччүктэр ааттарыгар кутурҕан мүнүүтэтин биллэрдэ.
САНАТТАХХА...
Евгений Пригожин салайааччылаах “Вагнер” чааһынай байыаннай хампаанньа сэрииһиттэрэ бэс ыйын 24 күнэ үүнэр түүнүгэр өрө турбуттара. Пригожин дойду байыаннайдарын “хампаанньа тыылга турар лааҕырдарын ытыалаатылар” диэн буруйдаабыта. Ол күн сарсыардатыгар “Вагнер” байыастара Доннааҕы Ростов куоракка баар Соҕурууҥҥу байыаннай уокурук штабар киирбиттэрэ. Ону таһынан, ЧВК холуонналара Воронеж уонна Липецкай уобаластарынан Москуба диэки айаннаан иһэллэрэ иһиллибитэ.
Ити күн киэһэтигэр Белоруссия бэрэсидьиэнин пресс-сулууспата Александр Лукашенко Пригожины кытта кэпсэппитин, ЧВК чилиэннэрэ Москубаҕа айанныылларын тохтотуох буолбуттарын туһунан иһитиннэрбитэ. Өтөр ону Пригожин бэйэтэ бигэргэппитэ. Ити кэнниттэн Кириэмил хампаанньа салайааччытын утары көбүтүллүбүт холуобунай дьыаланы тохтоторун туһунан эппитэ. ЧВК Доннааҕы Ростовтан тахсан, Белоруссия диэки айаннаабыта.
Хаартыска: Сергей ГУНЕЕВ
Бэйэ кэр.
