“Яндекс Путешествия” анаарааччылара чугас сытар омук сирдэригэр көтөр сөмөлүөт билиэтин сыаната ыараабытын туһунан кэпсииллэр.
Бэс ыйыгар сынньалаҥҥа сылдьыбыт Арассыыйа олохтоохторун 84 %-на дойду бэйэтин иһигэр күүлэйдээбиттэр. Дьон-сэргэ ордук Сочига, Санкт-Петербурга, Москубаҕа, Калининградка уонна Минеральнай Ууларга сынньаммыт. Турист 8 бырыһыана чугастааҕы омук сиригэр тахсыбыт, 9 бырыһыана – ыраах омук сиригэр. Ол туһунан эмиэ “Яндекс Путешествия” анаарааччылара иһитиннэрэллэр.
Быйыл омук сиригэр тахсааччылар ордук Турцияҕа, Арменияҕа, Казахстаҥҥа, Узбекистаҥҥа уонна Азербайджаҥҥа сылдьыбыттар. Оттон ыраах барааччылар Араап Холбоһуктаах Эмираттарын, Кытайы, Таиланы уонна Израили талбыттар.
“Дьон Арассыыйа бэйэтин иһигэр, ортотунан, 7 күн сынньанар эбит буоллаҕына, омук сиригэр 11 күҥҥэ баран кэлэллэр. Арассыыйа иһигэр биир “туочукаттан” иккис “туочукаҕа” диэри көтүү уонна эргийэн кэлии төлөбүрэ 36 бырыһыанынан ыараан турар – былырыын 10 100 солкуобай буоллаҕына, быйыл 13 700 солкуобай буолбут. Оттон көстүүнэйгэ биир хонуу – 5 850 солкуобай”, – диэн “Яндекс” үлэһиттэрэ кэпсииллэр.
Итини таһынан, анаарааччылар этэллэринэн, чугас эргиннээҕи омук сиригэр көтүү сыаната 9 бырыһыанынан эбиллибит, оттон ыраах көтүү 4 бырыһыанынан чэпчээбит.
Хаартыска: URA.ru
