От ыйын 3 күнүгэр Айсен Николаев Ил Дархан дуоһунаһыгар хандьыдаат буоларга Киин быыбардыыр хамыыһыйаҕа докумуоннарын туттарда. Кинини хандьыдаат быһыытынан “Биир ньыгыл Арассыыйа” баартыйа туруорда.
“Улахан эппиэтинэһи ылынарбын өйдүүр буоламмын, олус долгуйабын. Биэс сыл анараа өттүгэр сабаҕалыыр эбит буоллахпына, билигин бэйэбинэн билэбин. Саха сирин олохтоохторо миэхэ өрөспүүбүлүкэни салайарга итэҕэйбиттэригэр, төрөөбүт сирбэр туох кыалларын оҥорорбор кыах биэрбиттэригэр барҕа махталбын тиэрдэбин. Иннибитигэр өссө элбэх үлэ күүтэр. Бары бииргэ, иннибит диэки!” – диэн Айсен Николаев телеграм-ханаалыгар суруйар.
Санатар эбит буоллахха, “Биир ньыгыл Арассыыйа” өрөспүүбүлүкэ Ил Дарханын дуоһунаһыгар хандьыдаат быһыытынан Айсен Николаевы өссө бэс ыйыгар туруорбута. Кини иккис болдьоҕор турарын Арассыыйа бэрэсидьиэнэ Владимир Путин өйөөбүтэ, быыбарга ситиһиилэри баҕарбыта.
Саха сиригэр Ил Дархан быыбара бу күһүн балаҕан ыйыгар буолуохтаах. Быыбар үс күн – балаҕан ыйын 8-10 күннэригэр – буолара былааннанар. Ааспыт 2018 сыллааҕы Ил Дарханы талар быыбарга Айсен Николаев куолас 71,4 %-нын ылан эрэллээхтик кыайбыта.
Атын баартыйалартан, КПРФ-тан уонна ЛДПР-тан, Ил Дархан дуоһунаһыгар Виктор Губарев уонна Гаврил Парахин тураллара иһиллэр. Ол гынан баран, кинилэр докумуоннарын киин быыбардыыр хамыыһыйаҕа туттара иликтэр.
Бу туһунан СИА суруйар.
