Ааспыт сууккаҕа Саха сиригэр барыта 204 гаа иэннээх 29 саҥа баһаары буллулар. 15 сиргэ ойуур уотун умуллардылар, тоҕуһу хаптаттылар. Ол туһунан от ыйын 4 күнүгэр буолбут анал мунньахха СӨ Экологияҕа миниистирин солбуйааччы Андрей Коноплев иһитиннэрдэ.
“Баһаар этиҥнээх былыт сабардаан турар улуустарыгар таҕыста. Нэһилиэнньэлээх пууннарга уонна экэниэмикэ эбийиэктэригэр куттал суоһаабат. Уоту бохсууга 737 киһи уонна 38 тиэхиньикэ үлэлии сылдьар. Як-40 уонна Ан-26 зондировщик-сөмөлүөттэр сөптөөх былыт баар буоллаҕына, көтөргө бэлэм тураллар. Бэҕэһээ ардаҕы Хаҥаласка уонна Алдаҥҥа түһэрбиттэрэ”, – диэн Андрей Коноплев кэпсээтэ.
Ол курдук, бэҕэһээ барыта 340,5 гаа иэннээх 15 ойуур баһаарын Алдаҥҥа, Эдьигээҥҥэ, Өймөкөөҥҥө, Уус Майдаҕа, Аммаҕа, Бүлүүгэ, Кэбээйигэ, Ньурбаҕа, Томпоҕо, Уус Алдаҥҥа уонна Усуйаанаҕа умулларбыттар. Чурапчыга, Уус Майдаҕа, Өлүөхүмэҕэ, Өймөкөөҥҥө, Үөһээ Халымаҕа, Бүлүүгэ уонна Мэҥэ Хаҥаласка 9 уоту хаптаппыттар.
Санаттахха, от ыйын 3 күнүгэр Ил Дархан Айсен Николаев эрэгийиэн таһымнаах ыксаллаах быһыыны-майгыны биллэрбитэ. Онон сибээстээн, ойуурга тахсар, уот оттор бобуллан, хааччахтанан турар. Бүгүҥҥү туругунан, Саха сиригэр барыта 97,3 тыһыынча гаа иэннээх 119 баһаар баар.
Максим БОГОДВИД хаартыската.
