Соторутааҕыта Горнай оройуонун Бэрдьигэстээх сэлиэнньэтин биир маҕаһыыныгар тыын суолталаах бородууктаҕа: бурдукка, мас арыытыгар, үүккэ саахарга, риис, гречкэ курууппатыгар, чэйгэ, оҕо аһылыгар сыананы олоҕо суохтук үрдэтии тахсыбыта биллибитэ.
Оройуон борокуратуурата урбаанньыкка РФ КоАП 14.6 ыст. 1 ч. административнай кэһии оҥорбутун иһин дьыала тэрийбитэ. Онон, маҕаһыын сыаналарын судаарыстыба ирдэбилигэр сөп түбэһиннэрэн биэрбиттэр.
Дьиҥэ, сыананы олоҕо суохтук үрдэтии хайа баҕарар сиргэ элбэх. Ону үксүгэр саҥата суох «ыйыстан» кэбиһэбит. Тоҕо диэтэххэ, тугу гынары, ханна үҥсэри элбэх дьон билбэт. Оттон ытаабат оҕону, биллэн турар, эмсэхтээбэттэр.
Кырдьыга да, туһааннаах уорганнар нэһилиэнньэҕэ быһаарар үлэни үчүгэйдик ыыппаттар. Бэйэлэрин аан ситимнэригэр суруйан баран онон бүтэр курдуктар. Санаан да көрдөххө, наһаа элбэх үҥсүү киирэрин ким сөбүлүөй?
Онон, сыананы олоҕо суохтук үрдэтии тахсыбытын Борокуратуура уонна Роспотребнадзор оройуоннааҕы салааларыгар биллэриэххэ сөп диэн санатабыт. Үҥсүүнү тэрилтэ саайтын, электроннай почтатын нөҥүө ыытыахха эбэтэр төлөпүөнүнэн киллэриэххэ сөп.
Бэйэ кэр.
