Бу күннэргэ “Саханефтегазсбыт” аахсыйалаах уопсастыба Томпо оройуонун Тополинай сэлиэнньэтигэр кэнтиэйнэрдээх сапыраапкалыыр саҥа ыстаансыйаны арыйда.
Ыраах сытар нэһилиэк олохтоохторо, тэрилтэлэрэ уонна бырамыысыланнай хампаанньалар олоххо сүрүн суолталаах, олус наадалаах сир – сапыраапкалыыр ыстаансыйа – тутулларын өр кэтэспиттэрин манна бэлиэтиир тоҕоостоох. Саҥа КАЗС үлэҕэ киирбитэ өрөспүүбүлүкэ түргэн тэтимнээхтик сайдарыгар төһүү күүс буолуоҕа, кыһыҥҥы суолунан Депутатскайга уонна Баатаҕайга сүрүн табаардары тиэрдэри хааччыйыаҕа.
“Саханефтегазсбыт” АУо хапытаалынай өрөмүөҥҥэ генеральнай дириэктэри солбуйааччы Алексей Федоров кэпсээбитинэн, эбийиэккэ оператор дьиэтэ уонна уматыгы харайар, тырааныспарга кутар холуоҥкалардаах икки кэнтиэйнэр баар.
Саҥа ыстаансыйаҕа тырааныспары үс көрүҥ уматыгынан сапыраапкалыахха сөп: Аи-92, Аи-95 уонна дизельнай уматык (ДТ). Манна ньиэп бородуукталарын Хаандыгатааҕы ньиэп базатыттан анал систиэринэлэргэ кутан таһаллар. Ыстаансыйа кэнтиэйнэрдэрэ 2х20 м3 кээмэйдээхтэр. Таһаҕас тиэйэр улахан, анал уонна дьоҕус массыыналар сапыраапкаланыахтарын сөп.
Алексей Федоров этэринэн, хампаанньа саҥа ыстаансыйа тутуутугар быйыл сайын бүтүүтэ ылсыбыт. Маҥнай нэһилиэнньэни, тэрилтэлэри уматыгынан хааччыйары тохтоппот туһуттан анал болдьоммут кэмҥэ үлэлиир сапыраапкалыыр былаһаакканы туруорбуттар. Уоту-күөһү, спутниковай канаалы тардыбыттар, килийиэн каартанан бэйэтэ төлүүрүгэр терминалы холбообуттар.
Уопсайа 2908 м2 иэннээх сир учаастагын бэлэмнээбиттэр, былаһаакканы былааннааһыҥҥа, хахханы туруорарга үлэ ыыппыттар, КАЗС ыраахтан көстөрүн туһугар киирэр суолга оту-маһы ыраастаабыттар. Маны таһынан сир аннынан кабель лииньийэлэрин тардыбыттар, уот-күөс баҕаналарын, устар хаамыралары туруорбуттар. Систиэринэлэр үрдүлэринэн “Саханефтегазсбыт” АУо уоттаах-күөстээх, иһитиннэрии таблолаах стеллата баар.
Бу күннэргэ хампаанньа Нерюнгри оройуонугар Сосновай Бор бөһүөлэккэ өссө биир эбийиэги – сапыраапкалыыр саҥа ыстаансыйаны – арыйар былааннаахтар.
