Красноярскай кыраайга олорор аймахтарбытын, Дьэһиэй сахаларын, биллибэт ыарыы туран буулаата. Бөртөлүөт эрэ тиийэр, 700 киһи олорор бөһүөлэгиттэн 38 киһи, ордук оҕото элбэх ыалдьыбыт.
Ыарыы улахан куттала суох курдук, чэпчэкитик ааһар эбит. Киһи этигэр кытархай ымынахтар тахсаллар. Маннык ыарыы Арассыыйаҕа урут биллибэт буолан буолуо, кыраай мэдиссиинэтэ хайа ыарыы буоларын, туохтан турбутун кыайан быһаарбатах. Ол туһунан олохтоох “Эвенкия олоҕо” хаһыат суруйбут. Киин бэчээккэ, тэлэбиидэнньэ сорох ханаалларыгар эмиэ таһаарбыттар. Арассыыйа Минздрава ити чэпчэкитик ааһар, биллибэт ыарыы турбутун бигэргэппит.
Ыалдьыбыттар бары олохтоох ФАП-ка хааннарын туттарбыттар. Дьэһиэйгэ Роспотребнадзор эпидемиологтара уонна исписэлиистэрэ санитарнай сөмөлүөтүнэн көппүттэр
“360” телеханаалга Дьэһиэй олохтооҕо Ирина К.: “Соторутааҕыта кыыһым ыалдьыбыта. Ымынахтар балаҕан ыйын саҕаланыыта тахсыбыттара. Бастаан быраастар ветрянка дии санаабыттара. Ол эрээри бу инфекцияттан, аллергияттан, тымыр ыарыытыттан атын буолара биллибитэ. Кыыспын 3 нэдиэлэни быһа сордообута, сирэйиттэн атын сирэ барыта ымынах буолбута. Биир күн иһэ ыалдьыбыта, биирдэ хотуолаппыта, температурата 38 кыраадыска тиийэ тахсыбыта. Биһиги биоматырыйаал туттарар кииҥҥэ баран хаанын туттарбыппытын, “ветряной уоспа” буолбатах диэбиттэрэ. Атын диагноһы кыайан туруорбатахтара”, - диэн кэпсээбит.
Билигин Дьэһиэйгэ тиийбит исписэлиистэр бу туох ыарыыта буоларын, төһө кутталлааҕын быһааралларын кэтэһиэҕиҥ. Сэрэнэр сөп. Инники Доруобуйа харыстабылын аан дойдутааҕы тэрилтэтэ 2023 с. бүтүүтэ COVID-19-тааҕар кутталлаах кириип 4 штамма тахсыахтарын сөп диэбитэ.
Бэйэ кэр.
