Дьокуускайга “Кэлэр көлүөнэлэр пааркаларыгар” кумаар пааматынньыгын туруорабыт диир биһиги аныгымсыйбыта буолар, арҕаа ЛГБТ либералларга тардыылаах, “арт-искусствобыт диэйэтэллэрэ” эрэ бырахтарбат эбиттэр.
Хаартыскаҕа Арассыыйаны санкциянан тууйа олорор Евросойуус чилиэнэ Австрия киин куоратыгар Венаҕа бу күннэргэ 2,1 мөл. евро харчыга “Желатин” диэн арт-бөлөх, көмөлөһөөччүлэрин кытта, аҕыс ыйы үлэлээн (?), бу киһи хотуолуох дьаабы көстүүлээх 33 Квазимодолардаах фонтаны оҥорбутун көрөҕүт. “Желатиннар” дьахтар таҥаһын эрэ таҥнан хаартыскаҕа түһэллэр үһү. Кинилэр төрдүөн түспүт хаартыскаларын көрөҕүт. Бу дьон 20-чэ сыллааҕыта Зальцбург куорат Триумфальнай аркатыгар күргэ тута туран айаҕар ииктиир киһи пааматынньыгын оҥорбуттар. Оччолорго норуот бырачыастаан ити түктэри тутууну көтүрбүттэр.
Фонтаны арыйбыт куорат бургомистра Карл Люгер уонна федеральнай канцлер Александер Ван дел Беллен олус сөбүлээбиттэр. Онтон сылыктаатахха, Австрияҕа, Европаҕа улаханнык бэргээн сылдьар дьон судаарыстыбалар салалталарыгар аҕыйаҕа суохтар быһыылаах.
Оттон күн өйдөөх куорат олохтоохторо фонтаны абааһы көрөн уонна “уот сыаната үрдүү турдаҕына ити үлүгэр үбү туох да сыаннаһа суох дьаабыга куппуттар” диэн үҥсүү бөҕө суруйаллар эбит. Ол аата Европаҕа араас “чудо-арт-эбийиэктэри” оҥорууну хоруупсуйалыыр ньыма оҥостоллор эбит диэххэ сөп. Өссө кыһыйбыт, кэлэйбит куорат олохтоохторо пааматынньыгы “утурук искусствота”, “хоруупсуйа уонна сиэри тэпсии кыайыыта” диэн бэргэнник ааттаабыттар.
Киһи аймах кэлэр көлүөнэлэрэ Дьокуускай «Кумаарын» уонна бу фонтан курдук “ЛГБТ-ренессанс” истиилин сүгүрүйээччилэрэ буолуохтара суоҕа. Онон, кыбыстыылаах буолбатын туһугар эрдэттэн «Кумаары» суох оҥоруохха. Ол оннугар М.Е. Николаев пааматынньыга турара быдан ордук.
Владимир Степанов.
Сэҥээриилэр