Сэтинньи 25 күнүгэр Нам сэлиэнньэтигэр кырдьаҕастар уонна инбэлииттэр саҥа интэринээт-дьиэлэрин үөрүүлээхтик арыйдылар. 65 миэстэлээх эбийиэк «Демография» национальнай бырайыак иитинэн 99% федеральнай үп суотугар тутулунна.
«2018 сылтан саҕалаан «Аҕа көлүөнэ» тосхолунан Бүлүү Сосновкатыгар уонна Өлүөхүмэҕэ интэринээт-дьиэлэр тутулуннулар. Бүгүн 5 тыһ. кв.м. кэриҥэ иэннээх тутууну арыйдыбыт. Манна аҕа көлүөнэ олороругар уонна персонал үлэлииригэр бары усулуобуйа тэрилиннэ», – диэн Ил Дархан Айсен Николаев тыл эттэ уонна тэрилтэҕэ массыына бэлэхтээтэ. Кини кэлэр биэс сылга олоруу орто сааһын - 78, оттон 2030 сылга 80 тиэрдэр сорук турарын, көхтөөх уһун үйэлэниигэ усулуобуйаны тэрийиигэ улахан болҕомто уурулларын бэлиэтээтэ.
Саҥа интэринээт-дьиэни манна олорор, күнүскү өттүгэр кэлэн барар аҕам саастаах уонна доруобуйаларынан хааччахтаах дьон бэйэлэрин дьоллоохтук сананалларын курдук толкуйдаан туппуттар.
«Манныгы эрэ көрүөхпүт дии санаабатахпыт. Барыта наһаа кэрэ. Хас биирдии хос душтаах уонна туалеттаах. Телевизортан саҕалаан түүҥҥү лаампатыгар тиийэ хааччыйбыттар. Дьиэ иһэ наһаа сырдык, түннүгэ, үүнээйитэ элбэх. Хайа да муннуга барыта олус табыгастаах. Сынньанарга, аралдьыйарга барыта баар», - диэн кэргэнниилэр Тамара Гаврильевна Федотова уонна Владимир Николаевич Иванов үөрүүлэрин үллэһиннилэр.
Тэрилтэ дириэктэрэ Анастасия Заболоцкая этэринэн, бу интэринээти 1994 сыллаахха нэһилиэнньэ туруорсуутунан уонна улуус дьаһалтатын өйөбүлүнэн, быраастарга анаан тутулла турар уопсай дьиэҕэ тэрийбиттэр. Билигин манна букатын эбэтэр кылгас болдьоххо киирэн олороллор. «Үгүстэрэ букатын олохсуйар буоланнар, биир дьиэ кэргэн курдук сананаллар. Онон, үлэһиттэр күннээҕи эбээһинэстэрин толоруунан эрэ муҥурдамматар – олохтоохторго чугас доҕор, сэһэргэһээччи, уһуйааччы буолаллар», - диэн салайааччы санаатын эттэ.
Саҥа интэринээт-дьиэ бастакы сыбаайата 2021 сыллаахха түспүт. Төһө да, дьаҥ туран, сааҥсыйа ыган уустуктар үөскээтэллэр, эбийиэк тэтимнээхтик уонна үрдүк хаачыстыбалаах тутуллан, төрүттэммитэ 30 сылын көрсө үлэҕэ киирдэ.
