Амма Болугуругар саха сүөһүтэ кыстыыр икки саҥа хотону үлэҕэ киллэрдилэр. “Саха сүөһүтэ” хааһына тэрилтэтин Күллэги отделениетыгар 130 төбө турар хотонун арыйдылар.
Хотоннору Ил Дархан өрөспүүбүлүкэҕэ тыа хаһаайыстыбатын сайдыытын стратегическай хайысхаларын туһунан уурааҕар олоҕуран тутан киллэрдилэр. 100 төбө кыстыыр биир хотон иэнэ 577,8 кв.м.
Оттон 30 төбө кыстыыр иккис хотонун олохтоох биригээдэ Трофим Окороков салалтатынан тутта. Манна ньирэйдэр, борооскулар турар буолуохтара. Хотон тутуутугар 8 мөл.солк. субсидия көрүллүбүт.
Күн бүгүн Күллэгигэ 125 төбө саха боруода сүөһүтэ баар, ол иһигэр 47 ыанньык. Тэрилтэҕэ 6 киһи үлэлиир.
Отделение үйэтин сааһын тухары саха сүөһүтүн чөлүгэр түһэриигэ үлэлээбит Дмитрий Карманов аатын сүгэр.
Санатар буоллахха, Ил Дархан Айсен Николаев саха боруода сүөһүтүн 3 тыһ. тиэрдэр, ол иһигэр ыанар ынаҕы 1 тыһ. тиэрдэр соругу туруорбута.
