Бэрэсидьиэн Владимир Путин сорудаҕынан 2024 сылга Дьокуускайга Муусука үрдүкү оскуолатын саҥа комплексын тутуу саҕаланыаҕа. Ол туһунан Ил Дархан Айсен Николаев быйылгы Ил Түмэҥҥэ туһаайыытыгар эттэ.
Ону таһынан кини Саха сирин кэккэ улууһугар уонна куоратыгар бөдөҥ култуура эбийиэктэрэ үлэҕэ киириэхтэрин бэлиэтээтэ. Олор истэригэр өрөспүүбүлүкэ судаарыстыбаннаһын төрүттээччилэр төрөөбүт дойдуларыгар култуура комплекстара: Нам Хатырыгар - Махсыым Оммуоһап, Таатта Чөркөөҕөр - Былатыан Ойуунускай уонна Үөһээ Бүлүү Харбалааҕар - Исидор Бараахап киэннэрэ бааллар.
Владимир Путин быһаччы дьаһалынан Бэс Күөлүн сэлиэнньэтигэр Элбэх хайысхалаах киин тутуута бүтүөхтээх. Маны сэргэ Арассыыйаҕа ханна да суох хотугу култуура ураты эйгэтэ – Арктикатааҕы эпос уонна ускуустуба киинэ – үлэҕэ киириэхтээх.
Сонун төрдө: СӨ Бырабыыталыстыбатын уонна Ил Дарханын пресс-сулууспата
Хаартыска: Андрей Сорокин, ЯСИА
