Москуба Останкино кэнсиэртиир саалатыгар эдэр толорооччулар норуоттар икки ардыларынааҕы «Ороһуоспатааҕы Москуба уоттара» бэстибээл ыытылынна. Манна Арассыыйа бары муннугуттан оҕо кэлэктииптэрэ кытыннылар. Саха сирин аатын Дьокуускай к. «Чугдаар» уһуйаан «Уу-чуку-чук» фольклор ансаамбыла көмүскээтэ.
4-6 эрэ саастаах кырачааннары Москубаҕа салайааччылара Ксения Лаптеваны уонна төрөппүттэрэ арыаллаатылар. «Оторой-моторой» артыыстар уһун айаны, кэм уларыйыытын, тахсаары 7 чаастаах кэтэһиини аахсыбакка, нүөмэрдэрин чаҕылхайдык толорон, бэстибээл 1 истиэпэннээх лауреатын үрдүк аатын сүктүлэр. Оннооҕор атын кыттааччылар, «Уу-чуку-чуктары» ис сүрэхтэриттэн сөбүлээн, кэнсиэр кэннэ көрдөһөн хаартыскаҕа түстүлэр.
Сонун төрдө: Сахалайф
