Хаҥалас улууһун Тиит-Арыы нэһилиэгин баһылыга Григорий Лукин Бүтүн Арассыыйатааҕы «Служение» муниципальнай бириэмийэ «Киһи дьылҕата – Аҕа дойду киэн туттуута» анал номинациятын лауреатын аатын сүктэ.
Кини 2018 сыллаахха ууга түспүт биир дойдулааҕын быһаабыта. 58 саастаах Татьяна Романова, күргэ устун сүөһүтүн үүрэн иһэн, 2 миэтэрэлээх үрдүктэн муустаах өрүскэ түспүтэ. Дьолго, чугаһынан сылдьыбыт Григорий Лукин тута ууга ыстанан дьахтары быыһаан таһаарбыта.
Бэрэсидьиэн Владимир Путин сорудаҕынан олохтоммут бириэмийэ муниципальнай тэриллии сайдыытыгар уонна дьон олоҕун тупсарыыга ураты үтүөлээх үлэһиттэргэ туттарыллар. Маны таһынан, кини тохсунньу 16 күнүгэр «РФ Олохтоох салайыныытын үтүөлээх үлэһитэ» диэн бочуоттаах ааты олохтуур туһунан Ыйааҕы таһаарда.
Сонун төрдө: СӨ Бырабыыталыстыбатын уонна Ил Дарханын пресс-сулууспата