Улуустартан эбэтэр атын регионтан уопсастыбаннай тырааныспар суоппарынан үлэҕэ киирэ кэлбит дьоҥҥо үөрэх кэмигэр босхо олорор сир биэриэхтэрэ. Ол туһунан «Куорат суолун-тырааныспарын сулууспата» МХТ салайааччыта Эдуард Садовников кэпсээтэ.
Кини этэринэн, итини таһынан суоппардарга ипэтиэкэ кирэдьиитин субсидиялааһыны киллэрэр санаалаахтар. Оччотугар Дьокуускай куорат уокуруктааҕы дьаһалтата ипэтиэкэҕэ төһө эрэ суумманы төлүүр буолуоҕа. Ону олоххо киллэрэргэ туһааннаах тосхолу, нуорма-быраап аахтатын, суоппар уонна дьаһалта икки ардынааҕы дуогабары толкуйдаан оҥоруохтара.
Маны сэргэ, уопсастыбаннай тырааныспар суоппардарын босхо санаторий-курорт путевкатынан хааччыйар өйөбүл миэрэтэ бигэргэннэ. Эдуард Садовников суоппар үксэ орто саастаах буоларын уонна сорохтор 30 тахса сыл үлэлииллэрин бэлиэтээтэ. Биллэрин курдук, чааһынай суоппардар уоппускалара төлөммөт. Онон, бу миэрэ суоппардары көҕүлүө диэн эрэнэллэр.
Өссө өйөбүл ахсааныгар суоппардары үлэлиир таҥаһынан, чэпчэки сыаналаах куортам дьиэнэн хааччыйыыны киллэриэххэ сөп.
Сонун төрдө: Дьокуускай к. уокуруктааҕы дьаһалтата
