Быыбарга кыттар хандьыдааттар, үгэс быһыытынан, Быыбардыыр хамыыһыйаҕа дохуоттарын уонна баайдарын-дуолларын туһунан сибидиэнньэни туттараллар. Ол чэрчитинэн, тохсунньу 30 күнүгэр РФ Киин быыбардыыр хамыыһыйата (ХБК) хандьыдаат, билиҥҥи бэрэсидьиэн Владимир Путин дохуотун уонна баайын-дуолун туһунан сырдатта. Онно сурулларынан, бэрэсидьиэммит 2017 – 2022 сыллардаахха барыта 67,5 мөлүйүөн солкуобай дохуоттаммыт.
Ол курдук, ити ыйыллыбыт алта сыл иһигэр Путин 67 591 875 солкуобайы өлөрбүт. Декларацияҕа кини хамнаһа, бааннарга кылаата, сыаналаах кумааҕылара, байыаннай биэнсийэтэ уонна баайын-дуолун атыылаабыт харчыта ыйыллыбыт.
Владимир Путин Санкт-Петербурга биир бас билэр кыбартыыралаах (77 кв. м) уонна гараастаах (18 кв. м), ону таһынан үс массыыналаах эбит. Итиэннэ хас да бааҥҥа барыта 54 416 604,52 солк. суумалаах 10 счеттааҕа, “Санкт-Петербург” баан” ПАУо 230 аахсыйатын бас билэрэ этиллэр. “Обязательства имущественного характера” диэн графаҕа биир кыбартыыра (Москуба куорат бырабыыталыстыбата болдьоҕо суох туттарга 153,7 кв. м иэннээх дьиэни биэрбит) уонна эмиэ Санкт-Петербурга массыына турар миэстэтэ (гараас кэпэрэтиибэр болдьоҕо суох туһанарга анаан 18 кв. м иэннээх миэстэ бэриллибит) баара суруллар.
Итини таһынан, РФ КБХ-тын саайтыгар бэрэсидьиэн быыбарыгар кыттар үс хандьыдаат – Леонид Слуцкай (ЛДПР), Владислав Даванков (“Саҥа дьон”) уонна Николай Харитонов (КПРФ) – дохуоттара эмиэ ыйыллар.
Онтон көстөрүнэн, ааспыт алта сыл иһигэр Слуцкай 35 мөл. 989 тыһ. солк. дохуоттаммыт. Эмиэ ити сылларга Даванков 76 мөл. 915 тыһыынча, оттон Харитонов 36 мөл. 230 тыһыынча солкуобайы киллэрбиттэр.
Уопсайынан, бары бэрт сэмэй дохуоттаахтар эбит.
Бэрэсидьиэн быыбара быйыл үс күн устата – кулун тутар 15 – 17 күннэригэр – ыытыллыаҕа.
Хаартыска: РФ бэрэсидьиэнин пресс-сулууспата.
